ପାଦ

  

  

  ବାପା ବୋଉଙ୍କର ହାତ ଧରି ମୁଁ ତ

  କୁନିପାଦେ ମୋର ଚାଲି ଶିଖିଲି

  ଠୁକୁଠୁକୁ ହୋଇ ଘର ଅଗଣାରେ

  ନାଚିକୁଦି କେତେ ଘୁରି ବୁଲିଲି।

 ପାଦଛନ୍ଦି କେତେ ନାଚ ମୁଁ ନାଚିଲି

  ଗୀତ ସୁରେସୁରେ ଝୁମି ମୁଁ ଗଲି

  ପଡିଲି ଉଠିଲି ଦଉଡିଲି ପୁଣି

  ଖୁସିହୋଇ କେତେ ଡିଆଁ ମାରିଲି ।

  ସମୟ ସାଥିରେ ତାଳଦେଇ ମୁଁ ତ

  ନିଇତି ଚାଲୁଛି ପାଦ ମିଳେଇ

  ପ୍ରଭୁଙ୍କ କୃପାରୁ ପାଦ ମୋର ଯାଏ         

   ଆଗକୁ ଆଗକୁ ନିତି ଆଗେଇ ।

  ରାତି ନପାହୁଣୁ ପାଦ ଦୁଇ ମୋର

  କାମ କରିବାକୁ ହୁଏ ଚଞ୍ଚଳ

  ନୀରବି ଯାଏସେ କ୍ଲାନ୍ତହୋଇ ଯେବେ

   ଆଖିରେ ଆସଇ ନିଦ ବହଳ ।

 ମାଟିକୁ ତ ଛୁଇଁ ମନଛୁଆଁ କେତେ

  କାହାଣୀ ବଖାଣେ ଏ ପାଦ ଦୁଇ

  ଦିଗ ଚଉଦିଗ ବୁଲୁଛି ଘୂରୁଛି

  ଦେଖିଛି ଦୁନିଆ ଏ ପାଦ ପାଇଁ ।

  ପାଦ ପାଇଁ ମୁଁ ତ ଅଣ୍ଟାକୁ ସଳଖି

  ଆଜିଯାଏ ପରା ହେଉଛି ଠିଆ

  ପାଦ ପାଇଁ ମୋର ବାଟ ଚାଲୁଛି ମୁଁ

  ମନ ଖୁସିରେ ମୋ ଫୁଲେଇ ହିଆ ।

  ଯୋଡି ବେନି ହାତ କରେ ମୁଁ ମିନତି

  କାଳିଆ ଠାକୁର ହେ ଚକାଆଖି

   ଚାଲିବି ଚାଲିବି ନପଡିବି ଥକି

  ମୁଦିବା ଆଗରୁ ମୋ ଦୁଇ ଆଖି ।