ନମସ୍ତେ ଦେବ ଭାସ୍କର

ନମସ୍ତେ ଦେବ ଭାସ୍କର ନମଃ ଦିନନାଥ l

ନିଶି ନାଶଗଲା ଏବେ ହୋଇଛି ପ୍ରଭାତ ll

ସର୍ବପ୍ରାଣୀ ସୁଷୁପ୍ତିରୁ ହୋଇଲେ ଜାଗ୍ରତ l

ତଵ ଆଗମନେ ସାରା ସୃଷ୍ଟି ପୁଲକିତ ll

ମନ୍ଦେ ମନ୍ଦେ ବହୁଅଛି ମୃଦୁ ସମୀରଣ l

ଭ୍ରମରେ ଭ୍ରମନ୍ତି ଭ୍ରମେ କରି ଗୁଞ୍ଜରଣ ll

କାଆକାଆ ରବେ ଉଡ଼ି ବାୟସ ଡଗରା l

ବଜାଇଦେଲେଣି ଭବେ ପ୍ରଭାତୀ ନାଗରା ll

ଦେବାଳୟୁ ଭାସି ଆସେ କୀର୍ତ୍ତନ ରାଗିଣୀ l

ଧୂଳି ଶେଯ ତେଜିଲେଣି ସତୀ ଠାକୁରାଣୀ ll

କଳିଙ୍ଗଦେଶେ ଜନମ ହେ କାଶ୍ୟପ ସୂତ l

ଅର୍କ ତୀର୍ଥ କୋଣାରକ ବିଶ୍ୱରେ ବିଖ୍ୟାତ ll

ସକଳ ସୃଷ୍ଟି ଆଧାର ଦେବ ଦିବାକର l

ବିଶ୍ୱ ଚକ୍ଷୁ ବିଶ୍ୱ ତଵ ଅତୀବ ସୁନ୍ଦର ll

ଆଦି ଆଦିତ୍ୟଦେବ ହେ ସୃଷ୍ଟିର କାରଣ l

ନିରନ୍ତରେ ନିରଞ୍ଜନ ବ୍ରହ୍ମାଣ୍ଡେ ଭ୍ରମଣ ll

କ୍ରମେ ଦିବା ବୃଦ୍ଧିହୁଏ ଆଲୋକିତ ଧରା l

ମାଡ଼ି ଆସୁଅଛି ଧୀରେ ଧୀରେ ଟାଣଖରା ll

ସପ୍ତାଶ୍ୱ ବାହନ ରଥେ ସାରଥୀ ଅରୁଣ l

ନମଃନମଃ ଛାୟାପତି ସୂର୍ଯ୍ୟନାରାୟଣ ll