ନିଃସଙ୍ଗ ଜୀବନ

ବାସ୍ତବଠୁ ରହି ଅନେକ ଦୂରରେ

ତୋ 'ସପନ ମୁଁ ଦେଖୁଛି

ଭାବନାର ହାଟେ ଅନେକ ଖୋଜୁଛି

ସପନରେ ତତେ ନିତି ଭେଟୁଛି ।

ସତରେ କେବେବି ମିଳିନୁ ତୁ' ମୋତେ

କହିବି ବୋଲି ମୋ ହୃଦୟ କଥା

ତଥାପି ତୋଛବି ହୃଦୟୁ ହଟେନି

ମରମେ ଲାଗେ ମୋ ଦାରୁଣ ବ୍ୟଥା ।

ତୋ'ଭାବନାରେ ହଜିବା ପାଇଁ ମୁଁ

ସପନକୁ କରିଛି ଅତି ନିଜର

ଭାରି ଭଲଲାଗେ ତୋ'ସହ ଯେବେ

ସପନରେ ହଜି ପିଉଥାଏ ମୁହିଁ

ତୋ' ପ୍ରେମର ସେହି ମିଠା ଜହର ।

ଇଚ୍ଛା ହୁଏ ମୋର ତୋ' ଆଖିରେ ହଜିବି

ତୋ' ସପନରେ ଯିବି ଡୁବି

ତୁ'ଯଦି ଚାହିଁବୁ ଦେଇ ଦେବି ମୋର

ମନ ସିନ୍ଦୁକର ଚାବି ।

ଇନ୍ଦ୍ରଧନୁର ସପ୍ତରଙ୍ଗ ଭରି

ଆସୁଛୁ ସପନେ ମୋର

ସ୍ୱପ୍ନ ଭାଙ୍ଗିଗଲେ ମନର ବେଦନା

ଅସମ୍ଭାଳ ହୁଏ ମୋର ।

ସତରେ ନହେଉ ସପନରେ ପଛେ

ଏମିତି ତୁ' ଆସୁ ଥାଆ

ନିଃସଙ୍ଗ ଜୀବନ ଏକୁଟିଆ ପଥ

ତୁ' ହେଉଥା ମୋ ଜୀବନ ରାହା ।