🌼ନବ ବର୍ଷର ଅନୁଚିନ୍ତା🌼

ଗଡି ଗଡି ଯିବ ସମୟ ସୁଅରେ 

      ଉଜୁଡା ବରଷ ମାସ 

ନୂଆ ଉନ୍ମାଦନା ନୂଆ ସମ୍ଭାବନା 

      ଆଣିବ ନୂଆବରଷ

ଏନୂଆବର୍ଷଟି ତାମନକାଗଜରେ 

      ଲେଖିବ ତା ଅନୁଭୂତି 

ଭୁଲିଯାଅ ବନ୍ଧୁ ଅଫେରନ୍ତାସେ

       ପୁରୁଣା ଦିନର ସ୍ମୃତି

ସରି ତ ଯାଇଛି ହାରିବା ଜିତିବା 

     ପଡିଛି ମେଞ୍ଚାଏ ସ୍ମୃତି 

ରକ୍ତ ରଞ୍ଜିତ ଶତ ଶତ ପ୍ରାଣ 

      ହରାଇଛି ନିଜ ସ୍ଥିତି

କେତେନିଶାଖୋର ନାରୀମାଂସଲୋଭୀ 

    କାମାନ୍ଧ ଅତ୍ୟାଚାରୀ 

ସନ୍ତ୍ରାସବାଦୀ ଙ୍କ କଳା ଟଙ୍କା ର 

      ନ ଚଳୁ କାରବାରି

ଆଉବି ନହେଉ ଶୋଷଣଲୁଣ୍ଠନ 

      ବାଳିକା ର ବଳାତକାର 

ହତ୍ୟା ବିଭିଷିକା ହିଂସାଦ୍ୱେଷଆଉ 

      ଦୁର୍ଭିସହ ଅତ୍ୟାଚାର

ହେ ନୂତନବର୍ଷ ଆସ ଅବିଳମ୍ବେ 

     କରୁଛୁ ଆମେ ସ୍ୱାଗତ 

ମାନବିକତା ର ମୂଲ୍ୟବୋଧ ରେ 

      ଝରାଇଦିଅ ଅମୃତ

ପ୍ରତିଷ୍ଠିତ ହେଉ ସଭ୍ୟସମାଜରେ 

    ସତ୍ୟ, ଶାନ୍ତି ଭାଇଚାରା 

ଗତାନୁଗତିକ ଚିନ୍ତାଚୈତନ୍ୟରେ 

     ଉଲ୍ଲସିତ ହେଉ ଧରା

ସକଳେ ବଢନ୍ତୁ ସକଳେ ପଢନ୍ତୁ 

     ମହାମନ୍ତ୍ର ପ୍ରଗତିର 

ହାତେ ହାତଥୋଇ ସଭିଏଁଗାଆନ୍ତୁ 

     ମୂଳମନ୍ତ୍ର ଅହିଂସା ର

ଲୁହଲହୁ ର ଚିଟାଉ ଲେଖି 

      ପୂର୍ବ ବର୍ଷ ଚାଲିଯିବ 

ଦୁଇହଜାର କୋଡିଏ ପଦାର୍ପଣରେ 

     ନୂତନ ସୂର୍ଯ୍ୟ ଉଇଁବ