ନାରୀତ୍ଵର ଅସ୍ତିତ୍ବ

ସେଦିନ ପ୍ରଭୁ ଶ୍ରୀରାମ ବି ଚୁପ୍ ଥିଲେ

ଧର୍ମର ଦ୍ୱାହି ଦେଇ

ମର୍ଯ୍ୟାଦା ପୁରୁଷୋତ୍ତମର ଆଖ୍ୟା ପାଇ

ଆଉ ଅଗ୍ନି ପରୀକ୍ଷା ଦେଇ ଚାଲିଥିଲେ ସୀତା ।

ଲୋକାରଣ୍ୟ କୁରୁସଭା ତଳେ 

ଦ୍ରୌପଦୀଙ୍କ ଆକୁଳ ନିବେଦନ

ସେଦିନ ବି ଚୁପ୍ ଥିଲେ ପାଣ୍ଡବ

ଆଉ ସତୀତ୍ଵର ପ୍ରମାଣ ଦେବାକୁ ଯାଇ 

ଦ୍ରୌପଦୀ ହେଲେ ଲୁଣ୍ଠିତା ।

ଜଳୁଥିଲା ପ୍ରତିଶୋଧର ଅଗ୍ନି

ହୋଇଥିଲା ରାବଣର ଅନ୍ତ ଆଉ କୁରୁବଂଶର ନିପାତ

ସାଜିଥିଲା ଅଯୋଧ୍ୟା ପ୍ରଭୁ ଶ୍ରୀରାମଙ୍କ ପାଇଁ

ଆଉ ହସ୍ତିନାପୁର କରିଥିଲା ପାଣ୍ଡବଙ୍କ ସ୍ବାଗତ ।

କିନ୍ତୁ, ନିଜର ସ୍ୱାଭିମାନ ଆଉ ଅସ୍ତିତ୍ବକୁ ହରାଇ 

ଗୁମୁରି ଗୁମୁରି କାନ୍ଦୁଥିଲା ନାରୀତ୍ଵ 

ଆଉ ସମାଜ ଦୋଷ ଦେଇ ଚାଲିଥିଲା

ନାରୀ ପାଇଁ କୁଆଡେ ଏ ମହାଭାରତ ।