ନାଗ ବନ୍ଦନା
ନାଗ ବନ୍ଦନା
ଦିନେ କଂସର ଘରଣୀ ପଦ୍ମାବତୀ ରାଣୀ l
କହ୍ନାଇକୁ ବାର୍ତ୍ତା ଦେଲା ଦିଅ ଫୁଲ ଆଣି ll
ଲକ୍ଷେ ଭାର ପଦ୍ମେ ନ ଥିବ ପାଖୁଡ଼ା ମିଶା l
ସେଥିରେ ପୂଜା ହୋଇବ ଧନିତିରି ଓଷା ll
ପଦ୍ମ ତୋଳି କୃଷ୍ଣ ଯାଇ କାଳିନ୍ଦୀ ହ୍ରଦରେ l
କଠଉ ଚିହ୍ନ ଆଙ୍କିଲେ କାଳୀୟ ଶିରରେ ll
ପରମ୍ପରାରେ ଏ ଗୀତ ନାମ ପଦ୍ମ ତୋଳା l
ନାଗମାନେ ନାଚୁଥାନ୍ତି ଗୀତଗାଏ କେଳା ll
ଆଜି ଶୁକ୍ଳ ଚତୁର୍ଥୀ କାର୍ତ୍ତିକେ ନାଗ ପୂଜା l
ନାଗଲୋକେ ବାଜୁଅଛି ନଗେଶ୍ୱରୀ ବାଜା ll
ନମସ୍ତେ ନାଗ ଦେବତା ନମସ୍ତେ ହେ ଫଣୀ l
ଧରି ରଖିଅଛ ଶିରେ ଏ ସାରା ଧରଣୀ ll
କଶ୍ୟପ ଋଷି ସନ୍ତାନ କଦ୍ରୁ ତୁମ୍ଭ ମାତା l
ଗରୁଡ଼ ମାତା ବିନତା ତୁମ୍ଭର ବିମାତା ll
ଅଷ୍ଟକୁଳା ଅନନ୍ତ ହେ ନାହିଁ ଆଦି ଅନ୍ତ l
ତୁମ୍ଭ ମହିମା ଜାଣିବ କାହୁଁ ଦେହବନ୍ତ ll
ତୁମ୍ଭ ବକ୍ଷରେ ଶ୍ରୀହରି ଅନନ୍ତ ଶୟନ l
ଶତ୍ରୁ ତୁମ୍ଭର ଗରୁଡ଼ ଶ୍ରୀହରିଙ୍କ ଯାନ ll
ସାଗର ମନ୍ଥନ କଲେ ଦେବତା ଅସୁର l
ବାସୁକୀନାଗ ରଜ୍ଜୁରେ ବାନ୍ଧିଲେ ମନ୍ଦର ll
ତ୍ରେତୟା ଯୁଗରେ ଶେଷ ଦେବ ତୁ ଲକ୍ଷ୍ମଣ l
ଯା ବଳେ ଜିଣିଲେ ରାମ ଲଙ୍କାର ରାବଣ ll
ଦ୍ଵାପରେ ଶ୍ରୀକୃଷ୍ଣାଗ୍ରଜ ଭାଈ ବଳରାମ l
ମହାବଳ ତୋ ବଳକୁ ଅଛି କେବା ସମ ll
କଳି ଯୁଗେ ନୀଳାଚଳେ ଧବଳ ମୂରତି l
ତୁଳସୀ କ୍ଷେତ୍ରରେ ହଳି ତୁଳସୀଙ୍କ ପତି ll
ନାଗରେ ଭୂଷଣ ପ୍ରଭୁ ଦେବ ନାଗେଶ୍ୱର l
ପାର୍ବତୀଙ୍କ ପତି ମହାଦେବ ମହେଶ୍ୱର ll
ତଳ ଦିଗେ ପୂର୍ବ ଭାଗେ ଆଖଣ୍ଡଳମଣି l
ଆରଡ଼ି ଗ୍ରାମରେ ନାହିଁ ଗାରଡ଼ି ଓ ଗୁଣି ll
ଅନନ୍ତ ବାସୁକୀ ପଦ୍ମ ମହାପଦ୍ମ ଶେଷ l
କୁଳିକ ଶଙ୍ଖପାଳକ ତକ୍ଷକ ବିଶେଷ ll
ମଣିଭଦ୍ର କାଳୀୟ କମ୍ବଳ ଧୃତରାଷ୍ଟ୍ର l
କର୍କୋଟକ ଧନଞ୍ଜୟ ଶଙ୍ଖ ଐରାବତ ll
ଅଷ୍ଟକୁଳା ଶଙ୍ଖଚୁଡ଼ ଆଦି ନାଗ ଚୟ l
ପ୍ରାତ ସାୟଂ ବନ୍ଦେ ଖଣ୍ଡ ବିଷ ସର୍ପଭୟ ll
ଜରତ୍କାରୁ ଆସ୍ତିକ ଓ ମାତା ଶ୍ରୀମନଶା l
ସୁମରଣେ ତୁଟି ଯାଏ କାଳ ସର୍ପ ଦଶା ll
ନାଗ ଚତୁର୍ଥୀରେ ବନ୍ଦେ ମହାନାଗ ଗଣ l
ବିଶ୍ୱରୁ ହର ଦୁର୍ଗତି ବିଷାକ୍ତ ଦୂଷଣ ll
ନାଗଙ୍କ ସଙ୍ଗେ ବନ୍ଦଇ ନାଗ ଭୂଷଣଙ୍କୁ l
ନମସ୍ତେ ଦେବଙ୍କ ଦେବ ଶ୍ରୀମହାଦେବଙ୍କୁ ll