ମୋ ହୋଲି ର ରଙ୍ଗ ନାଲି
ମୋ ହୋଲି ର ରଙ୍ଗ ନାଲି
ତୁମେ ସିନା ଫଗୁଣର ଦୁଇ ଦିନ
ପାଳନ କରୁଛ ହୋଲି,
କିନ୍ତୁ ମୋ ଜୀବନେ ପ୍ରତି ମୁହୂର୍ତ୍ତ ହୋଲି
ମୁଁ ନାରୀ ଟିଏ ବୋଲି l
ତୁମେ ସିନା ଖେଳ ଇନ୍ଦ୍ରଧନୁ ରଙ୍ଗେ
କେତେ ସ୍ବପ୍ନ କୁ ଆବୋରି,
ମୋ ପାଖେ କେଉଁ ରଙ୍ଗ ସମ୍ଭାର ନାହିଁ
ମୋ ହୋଲି ର ରଙ୍ଗ ନାଲି l
ଜନ୍ମ ବେଳେ ରକ୍ତ ଜୁଡୁବୁଡୁ ଦେହେ
ଯେବେ ଧରା ପୃଷ୍ଠ ରେ ପଡିଲି,
ଜନ୍ମ ସାର୍ଥକ ହୋଇଗଲା ମୋର
କେତେ ମନେ ଭାବିଥିଲି l
କିନ୍ତୁ ବଡ ହେଲି ଯେବେ ଭାବିଥିଲି କେବେ
ପ୍ରେମେ ରଙ୍ଗ ଭିଜିବି,
ସ୍ବପ୍ନ ଦେଖିବି ମୁଁ କେତେ ରଙ୍ଗୀନ
ନିଜ କୁ ନିଜେ ଖୋଜିବି l
ମଥାରେ କେହି ନାଲି ରଙ୍ଗେ ଭିଜାଇ
ନେଇଯାଏ ପୁଣି ସ୍ବପ୍ନ ଦେଖାଇ,
କିନ୍ତୁ ସ୍ବପ୍ନ ତ ସ୍ବପ୍ନ ଭାଙ୍ଗିବ ନିଶ୍ଚୟ
ଭାଙ୍ଗେ ବନ୍ଧନ ରେ ରୁନ୍ଧି ହୋଇ ।
କେବେ ଦେଖିଛ କି କେଉଁ ନିର୍ଯ୍ୟାତିତ
ରକ୍ତ ଜୁଡୁବୁଡୁ ରଙ୍ଗ,
ଲୁହ ଲହୁ ସାଥେ ଭିଜି ଖେଳେ ପ୍ରତିଦିନ ହୋଲି
ତୁମେ ଭାବିପାର ସଂଯୋଗ ।
ତଥାପି ଭାବିଛି ଏ ଜୀବନ ଯାକଟା ଫଗୁଣ
ପ୍ରତିଦିନ ମୋର ହୋଲି,
କିନ୍ତୁ ତଫାତ ଏତିକି ତୁମେ ଖେଳ ସାତରଙ୍ଗେ
ମୋ ହୋଲି ର ରଙ୍ଗ ନାଲି l