ମୋ ଗାଆଁରେ ଜହ୍ନରାତି
ମୋ ଗାଆଁରେ ଜହ୍ନରାତି
ସରିଯାଏ ଦିନ ଯେବେ - ସୂର୍ଯ୍ୟ ବୁଡେ
ମୋ ଗାଆଁର ପାହାଡ଼ ପଛରେ,
ସଞ୍ଜନଇଁବା ଆଗରୁ - ଜହ୍ନ ଆସେ
ହସୁଥାଏ ପୂର୍ବ ଆକାଶରେ ।୧)
ଖରାଦିନେ ଚମତ୍କାର ଜହ୍ନରାତି
ମୃଦୁ ମନ୍ଦ-ମଳୟ ସାଥିରେ,
ନିମିଷକେ ହରିନିଏ ଗ୍ରୀଷ୍ମପୀଡା
ମନ, ପ୍ରାଣ ପୁଲକିତ କରେ ।୨)
ବର୍ଷା ଦିନେ ଜହ୍ନ ଖେଳେ ଲୁଚୁକାଳି
ହସୁଥାଏ ବାଦଲ ଫାଙ୍କରେ,
ଘନଘୋର ବରଷାରେ ଭିଜୁଥାଏ
ଗାଁଆ ଦାଣ୍ଡ ଛାଇ-ଆଲୁଅରେ ।୩)
ଶରତରେ ଜହ୍ନ ହସେ - ନଈପଠା,
କାଶତଣ୍ଡି ଫୁଲଙ୍କ ସାଙ୍ଗରେ,
ଆହା କି ବିମଳ ଶୋଭା ! - ସତେ ଅବା
ସରଗ କି ଆସିଛି ଧରାରେ ! ।୪)
ହେମନ୍ତେ ଶିଶିର ବିନ୍ଦୁ ଝରୁଥାଏ
ଜହ୍ନ ହସେ ନିଥର ବେଳାରେ
ଧୂଆଁଳିଆ ଶୀତରାତି ଭରା କ୍ଷେତ
ହଳଦିଆ ପାଚିଲା ଧାନରେ ।୫)
ଫୁଲର ଫଗୁଣ ଆସେ କି ସୁନ୍ଦର
ଗାଆଁ ଦାଣ୍ଡ ଜହ୍ନ ଆଲୁଅରେ,
ଚାରୁ-ଚଇତିର ସେଇ ଜହ୍ନରାତି
ଅପାଶୋରା - ମୁଁ ଯେ ନିତି ଝୂରେ ।୬)
ଫେରେନି ସେ ଦିନ ସିନା - ଇଚ୍ଛା ହୁଏ
ଭିଜିବାକୁ ଜହ୍ନ ଆଲୁଅରେ,
ମୋ ଗାଆଁ ପାହାଡ଼ ତଳେ ପୁଣିଥରେ
ମୋର ସବୁ ବନ୍ଧୁଙ୍କ ମେଳରେ ।୭)