ମାଟି ଆଜି ହସୁଛି

ସଂସାରଟା ଆଜି କାହିକିଁ କେଜାଣି

ନୂଆ ନୂଆ ମୋତେ ଲାଗୁଛି

ମଣିଷ ହାଟରେ କାଉ କୋଇଲିଙ୍କ

ସୁମଧୁର ସ୍ଵର ଶୁଭୁଛି l୧l

ଓଡ଼ିଆ କୁଟୀର ଶଙ୍ଖ ହୁଳହୁଳି

ଘଣ୍ଟଘଣ୍ଟା ନାଦେ କମ୍ପୁଛି

ପ୍ରତି ଘରେ ଆଜି ଧୂପ ଦୀପ ଝୁଣା

ମହମହ ହୋଇ ବlସୁଛି l୨l

ଗାଁ ଗଣ୍ଡା ଥିଲା ଶିରୀହୀନ ହୋଇ

ଲୋକ ଗହଳିରେ ଫlଟୁଛି

ନାକ ଟେକୁଥିବା ରଥି ମହାରଥୀ

ଗାଁ ରେ ଶରଣ ପଶିଛି l୩l

ବାପା ମାଆଙ୍କର ଆଖି ଲୁହ ବୋଧେ

ଦେବ ଦରବାରେ ପଡିଛି

ସଭିଙ୍କୁ ଏକାଠି କରିବା ନିମନ୍ତେ

କରୋନା ସଂସାରେ ଆସିଛି l୪l

ଲୋକ ଦେଖାଣିଆ ବିଶାଳ ପ୍ରାସାଦ

ଭୂତକୋଠି ହୋଇ ଯାଇଛି

ଗାଁ ଭିଟାମାଟି ଇନ୍ଦିରା ଆବାସ

ସରଗ ଭୂବନ ହୋଇଛି l୫l

ବାବୁ ସାହେବଙ୍କ ଆମିଷ ଭୋଜନ

ଖାଇବା ନିଶାଟା କମିଛି

ମାଆ ଭାତହାଣ୍ଡି ପିତାର ଏରୁଣ୍ଡି

ସୁରକ୍ଷା ବଳୟ ସାଜିଛି l୬l

ଗାଡି ମଟରର ବିକଟାଳ ଶବ୍ଦ

ଗର୍ଜନ ତର୍ଜନ ସରିଛି

ବାୟୁ ମଣ୍ଡଳର ପ୍ରଦୂଷଣ କମି

ଗଛ ପତର ମୋ ହସୁଛି l୭l

ବହୁ ବର୍ଷ ପରେ ପରିବାର ସବୁ

ଏକାଠି ରହିବା ଦେଖୁଛି

ମଣିଷର ନିୟନ୍ତ୍ରଣ ପାଇଁ ଆଜି

ପ୍ରକୃତି ଏ ଲୀଳା ରଚିଛି l୮l

ଫିଲ୍ମ, ସପିଂ, ମଦ ଭାଟି, ପାର୍କ

ମଶାଣି ହୋଇକି ପଡିଛି

ଏନ୍ତୁଡ଼ି ଶାଳଟା ସ୍ଵାଗତ ସଙ୍ଗୀତେ

ଖିଲି ଖିଲି ହୋଇ ହସୁଛି l୯l

ମତଗର୍ବ ଅହଂ ଭାଙ୍ଗିବl ନିମନ୍ତେ

କଳିର କରାଳ ଆସିଛି

"ମୁଁ" ବୋଲି ଗର୍ବ କରନାହିଁ ଆଉ

ତୋ' ଉପରେ ଜଣେ ରହିଛି l୧୦l