କୁମାର ପୂନେଇଁ

   

ଧରଣୀ ମାଆ ଠାରୁ ବିଦାୟ ନେଇ

   ବର୍ଷାରାଣୀ ଗଲା ମୁ଼ହଁ ବୁଲେଇ

ଶୁଭ୍ର ଶରତର ଆଗମନ ହେଲା

  ସ୍ୱଚ୍ଛଜଳେ କଇଁ ମୁହଁ ଦେଖଇ  (୧)

କୁମାର ପୂର୍ଣ୍ଣିମା ଜହ୍ନକୁ ଦେଖି

  କୁମାରୀ ମନରେ ଆନନ୍ଦ ଭରେ

ଜୋଛନାରେ ମନ ହୁଏ ଆନମନା

   ପ୍ରେମିକ ଚିନ୍ତାରେ ହୃଦୟ ଥରେ ।(୨)

ଶରତରେ ହସେ କାଶତଣ୍ଡୀ ଫୁଲ

  ନୀଳ ବୀଚିମାଳା ଖେଳେ ଆକାଶେ

ନୀଳ ଜଳରାଶି ଲହରୀ ଭାଙ୍ଗଇ

   ଚନ୍ଦ୍ରମାକୁ ଦେଖି କଇଁ ବି ହସେ।(୩)

ଜହ୍ନି ଫୁଲ ହସେ ଆକାଶକୁ ଚାହିଁ

    ହଳଦି ରଙ୍ଗରେ ଅଗଣା ହସେ

କୁମାରୀ କନିଆଁ ଆଞ୍ଜୁଳି ଟେକଇ

   ଚାନ୍ଦ ଚକଟାରେ ଦୁଆର ବାସେ ।(୪)

ପୁନେଇଁ ‌ଭିତରେ ଏ ପୁନେଇଁ ସାର

   ଅନ୍ଧାର ଭିତରେ ଆଲୋକ ଭରେ

କୋଟିଏ ଜୁହାର କରୁଛୁ ସାଦରେ   

 ଆନନ୍ଦ ଢାଳି ଦେ ତୋ ଆଞ୍ଜୁଳାରେ ।(୫)