କଥା ମୁଁ ହେଉଛି ତୁମ ଛବି ସହିତ

ଭାବି ନଥିଲି ମନରେ କେବେ

ଦେଖା ହେଉ ହେଉ ହୋଇଯିବ ପ୍ରେମ

ଭଲ ମୁଁ ତୁମକୁ ପାଇବି ଏତେ

ପ୍ରଥମ ଦେଖାରୁ ତୁମ ପ୍ରତି ହେଲି ଆକର୍ଷିତ

ମୋ ମନ ପ୍ରାଣ ତୁମଠାରେ ସମର୍ପିତ

ଶୟନେ ସପନେ ଜାଗରଣେ ହୁଏ ପୁଲକିତ

କଥା ମୁଁ ହେଉଛି ତୁମ ଛବି ସହିତ

ରହି ପାରୁନି ମୁହୂର୍ତ୍ତେ ହେଉଛି ବ୍ୟାକୁଳିତ

ଆବେଗ ମୋର ସାଗର ଲହରୀ ସମ

ନାଚି ନାଚି ଛୁଏଁ ହୃଦୟର ବେଳାଭୂମି ଅବିରତ

କେବେ ଆଖିରୁ ମୋର ଝରିଯାଏ ଲୋତକ

କେବେ ପୁଣି ପ୍ରାଣ ହୁଏ ସ୍ପନ୍ଦିତ

ଭାବ ଭାବନା ମୋର ରହେ ସଦା ଅବଦମିତ

କଥା ମୁଁ ହେଉଛି ତୁମ ଛବି ସହିତ

ଭୁଲି ପାରୁନି ଭଲ ପାଇବାର ମହନୀୟତା

ହୃଦୟ କନ୍ଦରୁ ଝରି ଆସେ ଅମୃତ

ପ୍ରେମର ଦୁନିଆଁ ପ୍ରେମ ଯେ ପବିତ୍ର ବନ୍ଧନ

ସାଥୀ ବିନା ଜୀବନର ନାହିଁ କିଛି ମୂଲ୍ୟ

ତୁମ ଲାଗି ମୋ ଯୌବନ ଫୁଲ ଉତ୍ସର୍ଗୀକୃତ

ଭାବି ନେଇଛି ତୁମେ ମୋର ଆରାଧ୍ୟ

ଇୟକାଳ ପରକାଳର ଦେବଦୂତ

ମଧୁ ମିଳନେ ପ୍ରେମ ଗୀତି ହେବ ଗୁଞ୍ଜରିତ

କଥା ମୁଁ ହେଉଛି ତୁମ ଛବି ସହିତ

ଏ ମୋର ପାଗଳପଣ ନା ଭାବ ପ୍ରଣବତା

ସପନର କଢ଼ ମନବନେ ହୁଏ କୁସୁମିତ

ପ୍ରେମିକ ଭଅଁର ସାଜି ତୁମେ ଆସ ଉଡ଼ି ଉଡ଼ି

ମୃଦୁ ମଳୟରେ ଦିଏ ମୁଁ ସନ୍ଦେଶ

ତୁମ ମନର ଅଗଣାକୁ କରିବାକୁ ମହକିତ

ମୋ ପରି ତୁମ ଭିତରେ ବି ଏ ଭାବ

ହେଉଥିବ ନିଶ୍ଚିତ ଭାବରେ ଆଲୋଡ଼ିତ

ପ୍ରକୃତ ପ୍ରେମ ଯେ ଚିରନ୍ତନ ଶାଶ୍ଵତ

ଆତ୍ମା ଆତ୍ମାର ମିଳନେ ଦୂରାଏ ଘନ ଅନ୍ଧକାର

ଜୀବନ ଦୀପ ଜଳେ କରିବାକୁ ଆଲୋକିତ

କଥା ମୁଁ ହେଉଛି ତୁମ ଛବି ସହିତ...।