କଙ୍ଗାରୁ କୋର୍ଟ
କଙ୍ଗାରୁ କୋର୍ଟ
କିଏ ଦେଲା କାହିଁ ନାମଟି ତୋହର
କଙ୍ଗାରୁ କୋର୍ଟ ବୋଲି
ଘଡି ଘଡିକରେ ବିଚାର ବଦଳେ
କଙ୍ଗାରୁ ଡେଇଁଲା ଭଳି l
କଙ୍ଗାରୁ ପରିକା ପେଟରେ ଲୁଚଇ
ସତ୍ୟ ନ୍ୟାୟ ଆଉ ଧର୍ମ
ଲୋଡ଼ା ହୁଏ ନାହିଁ ତଥ୍ୟ କି ପ୍ରମାଣ
ଲୋଡ଼ା ଜନ ସମର୍ଥନ l
ପାଞ୍ଚ ମଣିଷ ଏକାଠି କହିଲେ
ଛେଳି ବି କୁକୁର ହବ
ଡର ଧମକାଇ ଦି ଠେଙ୍ଗା ବାଜିଲେ
ନିର୍ଦୋଷୀ ଦୋଷ ମାନିବ l
ପୂର୍ବ ନିର୍ଧାରିତ ହୋଇଥାଏ ସବୁ
କିଏ କି ଦଣ୍ଡ ପାଇବ
ପ୍ରମାଣ ଆଳରେ କିଏ ଖସିଯିବ
କିଏ ଠେଙ୍ଗା ଛେଚୁଥିବ l
କାହା ଲାଭ କ୍ଷତି ହଉ କି ନ ହଉ
କୋଠ ହୁଏ ଲାଭବାନ
ଦଣ୍ଡ ଜୋରିମାନା ଏମିତି ଆସୁ
ମୋ କଙ୍ଗାରୁ କୋର୍ଟ ମହାନ l