କେନ୍ଦରା ଗୀତ

କାର୍ତ୍ତୀକ ମାସଟି ଭାଇ ଅତି ପୁଣ୍ୟମୟ

କେନ୍ଦରା ବଜାଇ ଗୀତଗାଏ ନାଥପୁଅ l

ଶିବଶମ୍ଭୁ ଇଷ୍ଟ ଆମ୍ଭ ଶ୍ରୀଗୋରେଖ ଦୀକ୍ଷା

କେନ୍ଦରା ବଜାଇ ଆମ୍ଭେ କରୁଅଛୁ ଭିକ୍ଷା l

ଟୀକା ଗୋବିନ୍ଦ ଚନ୍ଦ୍ରର କରୁଣ କାହାଣୀ

ସତ୍ୟସନ୍ଧ ହରିଶ୍ଚନ୍ଦ୍ର କାନ୍ଦ ଶୈବ୍ୟାରାଣୀ l

କପିଳା, ବଉଳା ଗାଇ ଅପୂର୍ଵ ଆଖ୍ୟାନ

ମହିମା ଗାଇ ବୁଲୁଛୁ ସତ୍ୟ,ଧର୍ମ,ଦାନ l

ଆଜି ଗାଉ ଅଛୁ ମାଆ ଅପୂର୍ବ କାହାଣୀ

କେଏଁକେଏଁ କେନ୍ଦରା କୀର୍ତ୍ତନ ହରିବାଣୀ l

ଅଯୋଧ୍ୟା ନବରେ ଥିଲେ ଦଶରଥ ରାଜା

ଅତି ସୁଲକ୍ଷଣୀ ତାଙ୍କ ତିନୋଟି ଭାରିଜା l

କୋଉଶଲ୍ୟା,କଇକେଇ,ସୁମିତିରା ଦେବୀ

ଆନନ୍ଦେ କାଟନ୍ତି କାଳ ରାଜା ପାଦ ସେଵି l

କାଳେ ହେଲେ ଦଶରଥ ଚାରି ପୁତ୍ର ପ୍ରାପ୍ତ

ଶ୍ରୀରାମ, ଲକ୍ଷ୍ମଣ, ଶତ୍ରୁଘନ, ଶ୍ରୀଭରତ l

ବାର୍ଦ୍ଧକ୍ୟରେ ରାଜା ଦଶରଥ ଚିନ୍ତା କଲେ

ରାମେ ଦେଇ ରାଜଭାର ବିଶ୍ରାମିବି ଭଲେ l

ଏମନ୍ତେ ବିଚାରି ଆୟୋଜନ କଲେ ରାଜା

ରାମହେବେ ରାଜା ଅବଧରେ ବାଜେ ବାଜା l

ଆହାଃ, କି ବିଧାନ ଭାଇ ଲେଖିଥିଲା ବିହି

ଦଶରଥ ବୁଢାକୁ ତା ଭାରିଜା କୈକେୟୀ l

ମନ୍ଥରା ବୁଦ୍ଧିରେ, ଦେଲେ ବର ଦୁଇ ମାଗି

ନଦେଲେ ରାଜନ ନିଶ୍ଚେ ଜୀବନ ହାରିବି l

ବୁଝାଇ ଥକିଲେ ରାଣୀ କିଛି ନ ଶୁଣିଲେ

ପତ୍ନୀବଶ ରାଜା ତହୁଁ ହାଆର ମାନିଲେ l

ପ୍ରଥମ ବରେ ଶ୍ରୀ ରାମ ଯିବେ ବନ ବାସ

ବଣରେ କାଟିବେ ଯାଇ ଚୋଉଦ ବରଷ l

ଦ୍ୱିତୀୟବରରେ ମୋ ଭରତ ରାଜା ହେବ

ଅଯୋଧ୍ୟା ଗାଦିରେ ରାଜ ପଣ ଚଳାଇବ l

Advertisement

ପିତୃ ସତ୍ୟ ଯହୁଁ ପ୍ରଭୁ ଶ୍ରୀ ରାମ ଶୁଣିଲେ

ଚିନ୍ତା କରନାହିଁ ତହୁଁ ପିତାଙ୍କୁ ବୋଇଲେ l

ଭାଇ ଲକ୍ଷ୍ମଣ ସଙ୍ଗତେ ସୀତା ନିଜନାରୀ

ଦଣ୍ଡକ ବନେ ଚଳିଲେ ଯତି ବେଶ ଧରି l

ପୁତ୍ରକୁ ନ ଦେଖି ଡାକି ହାୟ ହାୟ ରାମ

ଦଶରଥ ରାଜା ପ୍ରାପ୍ତ ହେଲେ ମୁକ୍ତିଧାମ l

ଜାନକୀଙ୍କୁ ହରିନେଲା ଲଙ୍କାର ରାବଣ

ଶରଣ ପଶିଲେ ଆସି ଭକ୍ତ ବିଭୀଷଣ l

ସେତୁ ବନ୍ଧ ବାନ୍ଧି ରାମ ଭାଲୁ କପି ଧରି

ସୀତା ଉଦ୍ଧାରିଲେ ଲଙ୍କା ରାବଣକୁ ମାରି l

ଅଧର୍ମରୁ ସ୍ବର୍ଣ୍ଣ ଲଙ୍କା ହେଲା ଛାର ଖାର

ହନୁମାନଙ୍କ ଲାଙ୍ଗୁଳେ ଜଳେ ବୈଶ୍ୱାନର l

ପିତୃସତ୍ୟ ପାଳି ଶେଷେ ଅରଣ୍ୟ ନିବାସ

କଟାଇ ଫେରିଲେ ରାମ ଚଉଦ ବରଷ l

ଅଯୋଧ୍ୟାନବରେ ପୁଣି ବାଜିଲା ବାଇଦ

ଅଯୋଧ୍ୟା ରାଜନ ରଘୁନାଥ ସତ୍ୟସନ୍ଧ l

ଅଲିଭା ଦାଗ ରହିଛି ଇତିହାସେ ଭାଇ

ପ୍ରାଣ ଯିବ ପଛକେ ବଚନ ଯିବ ନାହିଁ l

ଯୁଗେଯୁଗେ ଅଟଇ ଏ ରଘୁକୂଳ ରୀତି

ଶ୍ରୀରାମ, ଶ୍ରୀହରିଶ୍ଚନ୍ଦ୍ର ପାଳି ଯାଇଛନ୍ତି l

ସତ୍ୟ,ଦୟା,ଦାନ,ଧର୍ମେ ରଖିଥିବ ମତି

ନାଥପୁଅ କେନ୍ଦରାରେ ଗାଇବ କୀରତି l

ନମଃ ନମଃ ରଘୁନାଥ ରାଜୀବଲୋଚନ

ଭିକ୍ଷାଦିଅ ଯୋଗୀପୁଅ କରଇ କଲ୍ୟାଣ l