ଜୀବନ

ବନ୍ଧୁ ମନେରଖିଥିବ ଏତକ

ଜୀବନଟା ନୁହେଁ ରାଜପଥ ଜମା

ସେତ ଖାଲଢିପ ଭରା ସଡ଼କ ।

ସାପପରି ଏହି ଅଙ୍କାବଙ୍କା ବାଟେ

ଆନମନା ଯିଏ ହୁଏ

ଦୁଃଖ ଅବସାଦ କରେ ତାକୁ ବାଦ

ନିଦ ତାର ହଜିଯାଏ ।

ଅମୂଲ ମୂଲ ଏ ମଣିଷ ଜୀବନ

ଏକଥା ମନରେ ହେଜି

ଅକାଳେ ପ୍ରମାଦ ପଡେନାହିଁ ଜମା

କାମକଲେ ବୁଝିସୁଝି ।

ଜୀବନ ପଥରେ ଦୋଛକି ପଡିଲେ

ଚଞ୍ଚଳ ହୁଅଇ ମନ

ବିବେକ କଥାରେ ବାଟ ବାଛିନେଲେ

ହେବନାହିଁ ହୀନିମାନ ।

ଆଶା ନିରାଶାର ମରୁ ମରିଚିକା

ମନକୁ ଭୁଲାଇ ଦିଏ

କପାଳତା ଫଟା ହୁଏ ହଟହଟା

ବାଟ ଯିଏ ଭୁଲିଯାଏ ।

ସଞ୍ଜମ ଶୃଙ୍ଖଳା ନୀତି ନୀୟମ କୁ

ମାନି ଯିଏ ଚାଲେ ବାଟ

ହସ ଖୁସିରେ ତା ଜୀବନ ବିତଇ

ଭୋଗେନାହିଁ ଦୁଃଖ କଷ୍ଟ ।

ଈଶ୍ୱରଙ୍କୁ ଭକ୍ତି ପିତାମାତା ସେବା

ଜୀବନର ବଡ ବ୍ରତ

ଧର୍ମ କର୍ମ ଦୟା ସତ୍ୟ ଶାନ୍ତି କ୍ଷମା

ମଧୁର ଜୀବନ ଗୀତ ।