ଜୀବନ ଗଣିତ

ନିଜର ରହସ୍ୟ ନିଜକୁ ଅଜଣା

ବିତିଚାଲେ ଦିବା ରାତି 

ତଥାପି ବଞ୍ଚିଛି ଗଣନା କରୁଛି

ଲଭିବାକୁ କିଛି ପ୍ରୀତି l

ଗଣିତ ପଢ଼ିଛି ଗଣିତ କଷିଛି

ଜାଣଇ ଗଣିତ ସୂତ୍ର 

ଜୀବନକୁ ଯେବେ ନିରେଖି ଦେଖିଲି

ଖୋଲିଗଲା ମୋର ନେତ୍ର l

ଜୀବନ ଗଣିତ ଅବୁଝା ରହିଲା 

ଯେତେ କଲି କଷା କଷି 

ଯୋଗ ବିୟୋଗରେ ଅସଫଳ ହେଲି 

ଭାଗଫଳ ହେଲା ବେଶୀ l

ମାଆ ର ଗର୍ଭରୁ ଜନମ ଯେ ନେଲି 

ପ୍ରାରବ୍ଧ ହେଲା ମୋ ଦୃଷ୍ଟ 

କର୍ତ୍ତା ଭାବ ରଖି କ୍ରିୟା ଯାହା କଲି 

କ୍ରିୟମାଣ ହେଲା ସୃଷ୍ଟ l

କର୍ମଫଳ ଭୋଗ ଶେଷେ ଯା ବଳିଲା 

କ୍ରିୟମାଣୁ ଦେଲି ଫେଡ଼ି 

ଅବଶେଷ ପୁଣି ସଞ୍ଚିତେ ମିଶିଲା 

ଭାଗଶେଷ ଗଲା ବଢ଼ି l

ମିଶାଣ ଫେଡାଣ ହରଣ ଗୁଣନ

ଯେତେ ଯାହା ଥିଲି ଜାଣି 

ଜୀବନ ଗଣିତେ କାମେ ନ ଆସିଲା

କର୍ମ ଆଗେ ହେଲି ଋଣି l

ଏପରି ଗଣିତ ଜନ୍ମ ଜନ୍ମ ଧରି 

କଷି ଚାଲୁଅଛି ଭାଇ 

କର୍ମଫଳ ଭୋଗ ଶେଷ ହେଉନାହିଁ 

କର୍ମଚକ୍ରେ ଘୂରେ ମୁଁହି ।