ବିଜୟା ଦଶମୀ

ପଡ଼ିଛି ବିପତ୍ତି ଦେବେ କଲେ ସ୍ତୁତି 

ଆସ ମାତା ଆଦ୍ୟାଶକ୍ତି 

ମହିଷା ଅସୁର କର ମା ସଂହାର 

ସର୍ବେ ଦିଅ ଅନୁରକ୍ତି l

ଏକ ଶକ୍ତି ସେହି ନବ ରୂପବହି 

ନଭୁ ହେଲେ ଆବିର୍ଭୂତା 

ଏକ ଏକ ରୂପେ ଭବେ ଉଭାହେଲେ

ନବଦୁର୍ଗା ଆଦିମାତା l 

ରଣ ଦୁନ୍ଦୁଭିରେ ପ୍ରକମ୍ପିତ ହେଲା 

ପ୍ରକମ୍ପିଲା ମହିପୁର 

ଚଣ୍ଡୀ ଚାମୁଣ୍ଡାଙ୍କ ବିକଟାଳ ସ୍ୱର 

ଶୁଣି ଦୈତ୍ୟ ଥର ହର l

ଉଗ୍ର ରୂପବହି ଅଗ୍ରସର ହେଲେ 

ଦେବୀ ଦୁର୍ଗା ଦଶଭୁଜା 

ମହିଷା ଅସୁର ପ୍ରାଣ ବିନାଶିଲେ 

ଉଡ଼ିଲା ବିଜୟ ଧ୍ଵଜା l

ଜୟ ଜୟ କାରେ ଉଛୁଳି ଉଠିଲା 

ତ୍ରିଭୁବନ ଦଶଦିଶ 

ବିଜୟ ଉତ୍ସବ ପାଳନ କରିଲେ 

ସ୍ତବିଲେ ବିଜୟା ଯଶ l

ତ୍ରିଗୁଣ ଆତ୍ମିକା ଶକ୍ତିସ୍ଵରୂପିଣୀ

ତ୍ରୟୀରୂପା ଆଦ୍ୟାଶକ୍ତି 

ତ୍ରିକାଳେ ବନ୍ଦିତା ତ୍ରିଭୁବନ ମାତା 

କାଳୀ ଲକ୍ଷ୍ମୀ ସରସ୍ଵତୀ l

ତୁହି ସର୍ବଶକ୍ତି ସନାତନୀ ମୂର୍ତ୍ତି

ତୁହି ମାତା ବିଶ୍ଵେଶ୍ୱରୀ 

ନାନାରୂପେ ତୁହି ଜଗତେ ପୂଜିତା

ଦୁର୍ଗା ତାରା ମାହେଶ୍ଵରୀ l

ଦ୍ୟୁଲୋକ ବାସିନୀ ଭୁବନ ମୋହିନୀ

ତ୍ରିଲୋଚନୀ ଶିବ ଜାୟା 

ତୁହି ଆଦିମାତା ତ୍ରିଲୋକେ ବନ୍ଦିତା

ମହାକାଳୀ ମହାମାୟା l

ଦଶବିଦ୍ୟା ତୁହି ନବଦୁର୍ଗା ତୁହି

ଲକ୍ଷ୍ମୀ ଭୁବନ ମୋହିନୀ 

ବିଷ୍ଣୁମାୟା ତୁହି ରଜ ଗୁଣମୟୀ 

ଧନ ବୈଭବ ଦାୟିନୀ l

ଶ୍ୱେତ ଗୁଣମୟୀ ଶୁଦ୍ଧ ଵିଦ୍ୟାଦାୟୀ 

ସତ୍ତ୍ଵମୟୀ ସରସ୍ଵତୀ 

ଅଜ୍ଞାନ ହାରିଣୀ ଜ୍ଞାନ ପ୍ରଦାୟିନୀ 

ବିଶୁଦ୍ଧ ବିଜ୍ଞାନେ ପ୍ରୀତି l

ବ୍ରାହ୍ମୀ ପ୍ରଜ୍ଞାଶକ୍ତି ଶୁଦ୍ଧ ପ୍ରେମା ଭକ୍ତି 

ଜ୍ୟୋତିର୍ମୟୀ ସନାତନୀ 

ରାଜ ରାଜେଶ୍ୱରୀ ତ୍ରିପୁରା ସୁନ୍ଦରୀ 

ଭକ୍ତି ମୁକ୍ତି ପ୍ରଦାୟିନୀ l