ଗୋଲାପ ପରି

ଗୋଲାପ ପରି       ଗୋଲାପି ଓଠେ

             ଯେବେ ତୁ ଦେଉ ହସି

ସାରା ବଗୀଚା       ଖୁସିରେ ଝୁମେ

            ଦେଖେ ମୁଁ ଲୁଚି ବସି ||୧ ||

ଫୁଲର ଡ଼ାଲା         ହାତରେ ଧରି

           ଯେବେ ତୁ ନହିଁ ପଡୁ

ପଣତ କାନି          ଖସେ ମଥାରୁ

         ଦେଖେ ମୁଁ ଛାଡି ଝାଡୁ ||୨ ||

କଳା ଭଅଁର         ମୁକୁଳା କେଶ

         ଯେବେ ତୁ ଦେଉ ଖୋଲି

ବାଦଲ କୋଳେ     କାଳିଆ ମେଘ

         ଦେଖେ ମୁଁ ଖିଲି ଖିଲି ||୩ ||

ଶାଢୀ କାନିକୁ          କେଶ ରାଶିକୁ

        ଯେବେ ତୁ ନେଉ ଖୋସି

ତାରା ଫୁଲରେ       ଅଗଣା ହସେ

        ଦେଖେ ମୁଁ ବସି ବସି ||୪ ||

ହସି ହସିକା         ସରାଗୀ ପ୍ରିୟା

       ଯେବେ ତୁ ନେଉ ଫୁଲ

ସଜ ଗୋଲାପ      ଫିକା ପଡିବ

       ଦେଖେ ମୁଁ ଝଲ ମଲ ||୫ ||

ଡେମ୍ଫର କଣ୍ଟା         ମୁଣ୍ଡିଆ ଥୁଣ୍ଟା 

         ଯେବେ ସେ ଫୋଡି ଯାଏ

ଚମ୍ପା କଢିକୁ          ଚୁମିବା ପାଇଁ

       ଭାବେ ମୁଁ ହାଏ ହାଏ ||୬ ||

ଲମ୍ବା ଡେମ୍ଫକୁ     କଣ୍ଟା ଝଟାକୁ

       ଯେବେ ତୁ ଦେଉ ଆଢି

ପ୍ରିୟା ପରଶ       ଆଦିମ ଛୁଆଁ

       ଦେଖେ ମୁଁ ଯାଏ ବଢି ||୭ ||

ଗଛକୁ ଗଛ     ଫୁଲକୁ ଫୁଲ

    ଯେବେ ତୁ ଖୋଜୁ ହଜି

ଝରକା କଡେ     ସପନ ନିଡ଼େ    

ଦେଖେ ମୁଁ ନୀତି ମଜ୍ଜି ||୮ ||

ଗୋଲାପ ପାଖୁଡା       ଚନ୍ଦ୍ର ମୁଖଡା

      ଯେବେ ତୁ ଦେଉ ଚାହିଁ

ମନ ଉଦ୍ୟାନେ      କଡମ୍ବ ଫୁଟେ

    ଦେଖେ ମୁଁ ହାଇଁ ପାଇଁ ||୯ ||

ଗୋଲାପ କଳି       ଗୋଲାପ ଧରି

      ଯେବେ ତୁ ବେଗି ଆସୁ

ଅଗଣା ଘର      ବାରି ଦୁଆର

     ଦେଖେ ମୁଁ ହସୁ ହସୁ  ||୧୦ ||