ଘରକୁ ଆସିବୁ ବୋଲି

ମିଠା ବରକୋଳି ଜଟେଇ ଦେଇ ତୁ

ଖଟାକୁ ଚଖେଇଦେଲୁ,

ମୁରୁକି ହସାରେ ବେଜାଏ ଖୁସିରେ

ଭିତର ଖଞ୍ଜାକୁ ଗଲୁ !

ଆମ୍ବଡ଼ା ଧରିକି ହରିଡ଼ା ବୋଲୁଚୁ

ସିଆଣୀ ଏକା ତୁ ଭାରି,

ତରଡ଼ା ଦେଖେଇ ଜହ୍ନିକୁ ଚିହ୍ନେଇ

ଭାବୁଚୁ ଭୁତିଆ ଶିରୀ !

ତବତ ପାଣିକୁ ତୋ ହାତ ଯାଉନି

ଭାତକୁ ଦେଖୁଚି କହୁ,

ପାଣିଆ ଗୁଡ଼କୁ ଜିଭରେ ମାରିକି

ବୋଲୁଚୁ ଚାଟୁଚି ମହୁ !

ଅଳପ ରାଗରେ ଆଖିକୁ ଜକାଉ

କହୁଚୁ ପଡ଼ିଲା ପୋକ,

ଆଖିକୁ ଫୁଙ୍କିଲେ ପୋକକି ବାହାରେ

ଗାଲକୁ ଚାହୁଁଚୁ ବୋକ !

ରୁଷିଲେ ଏମିତି ଗୋଡ଼କୁ ଛାଟୁଚୁ

ପାଉଁଜି ଛିଟିକି ପଡ଼େ,

ଡାଆଣୀ ଗୁଣିଆ ତତେଲୋ ଜଣାଟି

ମରମ କଥାକୁ ଯୋଡ଼େ !

ଦୁନିଆଯାକର କଥାକୁ ବଖାଣୁ

ଭଲେଇ ହେଉଚୁ ବେଶି,

ଆଉ କା'କଥାକୁ ପାଖରେ ପାଇଲେ

ମିଛରେ କରୁଚୁ ଦୋଷୀ !

ଦୁଆର ଫାଙ୍କରେ କଣେଇ ଚାହୁଁଚୁ

ପାରୁନୁ ସହଜେ ଭୁଲି,

ସକେଇ ହଉଚୁ କାନିକୁ ପକେଇ

ଘରକୁ ଆସିବୁ ବୋଲି !