ଗେଣ୍ଡୁମାଳି

କାନ୍ଧରେ ନାଲିଆ 

ଗାମୁଛା ପକେଇ

ହରିଆ ପୁରିଆ

କାଳିଆ ବନା

ପଞ୍ଚାୟତ ଅଫିସ୍ 

ପିଣ୍ଡାରେ ଭିଡ଼ ନାହିଁ

ପାର୍ଟୀ ପତାକା 

ବ୍ୟାନର କନା ।

ଶୁଭୁନି ଆଉ 

ଡାକବାଜି ଯନ୍ତ୍ରର 

ଘନ ଘନ ତୂର୍ଯ୍ୟନାଦ 

ପ୍ରଚାର ସ୍ଵର

ଗାଁ ଦାଣ୍ଡରେ 

ଗଡୁନି ବୁଲେଟ୍ ଗାଡି

ଫଟ୍ ଫାଟ୍

ପେଁ ପାଁ

କେଁ କଟର ଘର୍ଘର ।

ହୁଣ୍ଡା ଧୁଣ୍ଡା ଗୁଣ୍ଡା

ସାଥିରେ ଛୋଟI ମୋଟା

ତୁଣ୍ଡି ଖୋଲି 

କରୁଥିଲେ ଠିଆ ପାଲା

ରାଣ୍ଡି ଖାଣ୍ଡି ଚଣ୍ଡି ଭଦଣ୍ଡୀ 

ପିନ୍ଧି ପାଟ ଖଣ୍ଡି

କାକୁତି ମୀନତି 

ନମସ୍ତେ ସମସ୍ତେ 

ଠେଲା ମେଲା ଝାମେଲା ।

ଲାଗୁଥିଲା ନିର୍ବାଚନ

ତାତିରେ କିମିଆଁ ଅଛି

ମୂକ ବଧିର ବି ବିକୁଥିଲେ

ଜିନ୍ଦାବାଦ୍ ନାରା

ଛୋଟI କେମ୍ପା ଅକାର୍ଜିମାନେ 

ମଦ ଟୋପାଏ ପାଇ

ପଙ୍ଗୁ ଅଥର୍ବ ଲଙ୍ଘୁଥିଲେ 

ସୀମାରେଖା ପରା ।

କେବିନ୍‌ ତଳ 

କ୍ଳବ୍ ଘର

ପାନ ଦୋକାନ ପଛେ

ଖାସି କୁକୁଡ଼ା 

କଣ୍ଟା ମାଳ ମାଳ

ଭଙ୍ଗା ମଦ ବୋତଲ 

ପଡିଛନ୍ତି ମୁଁହ ମାଡି

ବୋଧେ ପାଞ୍ଚବର୍ଷ 

ସରିଲା ଯୁଦ୍ଧଖେଳ ।

ଫଳ।ଫଳ

ଘୋଷଣା ସରିନି 

ଫେରିବା ପ୍ରସ୍ତୁତି

ବସ୍ତା ବ୍ୟାଗ୍ 

ସଜଡ଼ା ଚାଲିଛି ପିଣ୍ଡେ 

ଦାଦନକୁ ଫେରିଯିବେ 

ବଂଶର ପ୍ରଦୀପ

ପାଞ୍ଚ ଶହରେ

 ବିକ୍ରି ଭୋଟ୍ ଖଣ୍ଡେ ।

ନାଟକର ଶେଷ ଦୃଶ୍ୟ 

ପରି ଲାଗୁଥିଲା

ଜିତିବା ରେ ଭାଇ 

ଜିତିବା ପାଳି

ଗଣତନ୍ତ୍ର କାନ୍ଦୁଥିଲା

ଗୁମୁରି ଗୁମୁରି

ପ୍ରତିଧ୍ଵନି ପରିହାସ 

କୋଳାକୋଳି କରତାଳି

ବେକେ ଗେଣ୍ଡୁମାଳି ।