ଏଇ ପରା ମୋ ଦେଶ

  ପ୍ରାଣ ମିତଣୀ ଥରୁଟିଏ ତୁ 

   ବଡ଼ ଦେଉଳ କୁ ବୁଲି ଦେଖ 

ଧନୀ ଗରୀବ ଛୁଆଁ ଅଛୁଆଁ 

   ସଭିଙ୍କ ପାଇଁ ଉଡଇ ନେତ |

ମହୋଦଧିରେ ଲହଡି ଖେଳେ 

    ସବୁରି ପ୍ରାଣେ ପୁଲକ ଭରି 

କାହାକୁ କେବେ ଭାବେନି ପର 

   ସବୁ ତ ତା'ର ନିଜର ପରି |

ବାରବାଟୀ ର ବୀର ର ମାଟି 

   କହେ ଓଡ଼ିଆ ପୁଅର କଥା 

ଦେଶ ପାଇଁ ଯେ ଜୀବନ ଦେଲେ 

  ଉଞ୍ଚା କରିଲେ ମାଆର ମଥା |

ଖୋରଧାଗଡ଼ ପାଇକ ପୁଅ 

   ବରୁଣେଇ ର ପାହାଡ଼ ତଳେ 

ଗୋରାସାହେବ ତଡି ଦେବାକୁ

  ଅସ୍ତ୍ର ଶସ୍ତ୍ରରେ ସଜ୍ଜିତ ହେଲେ |

ଦରିଆ ବାଲି କୁହଇ ଆଜି 

   କରନି ଭୟ କରନି ଭୟ 

ସରବେ ଆସ କହିବା ମିଶି 

    ମାଆ ର ଜୟ ମାଆ ଜୟ |

ସ୍ୱାଧୀନତା ଆମ ନ୍ୟାର୍ଯ୍ୟ ପ୍ରାପ୍ୟ 

  କ୍ଷମତାଭୁକ୍ତ ହାତ ଆମର 

ମରିବା ପଛେ ଡରିବା ନାହିଁ 

  ଅଧୀନ ହେବା ନାହିଁ କାହାର |

ମାଆ ଆମର ମମତା ମୟୀ 

  ସୁଖଦାୟିନୀ ରୂପ ସୁନ୍ଦର 

ତାର ପବିତ୍ର ଚରଣେ ମୋର  

 କୋଟି ଜୁହାର କୋଟି ଜୁହାର |