ଏ ଜହ୍ନ ଟିକେ ଶୁଣ ନା
ଏ ଜହ୍ନ ଟିକେ ଶୁଣ ନା
ତୁ ତ' ନ ଥିଲୁ କାଲି ଆକାଶରେ
ଭାରି ଫାଙ୍କା ଫାଙ୍କା ଲାଗୁଥିଲା
ସବୁକିଛି ତୋ' ଅବର୍ତ୍ତମାନରେ
ମନେପଡ଼ିଲା, କାଲି ପରା ଅମାବାସ୍ୟା ଥିଲା !
ଚତୁର୍ଥୀ ରାତିରେ ତୋ' ସୌନ୍ଦର୍ଯ୍ୟ ଆଭା
ସତରେ ଭାରି ମନଲୋଭା
ରୂପେଲି କାଚଚୁଡ଼ି ଖଣ୍ଡେ
ସତେକି ଆକାଶେ ହୋଇଛି ଉଭା !
ସପ୍ତମୀ ରାତିର ତୋ' ଚମକ
ଆଣେ ସଭିଙ୍କ ମନରେ ପୁଲକ
ଦାଉଦାଉ ଖଣ୍ଡେ ରୂପାଦାଆ ସତେ
କାଟିଚାଲିଛି ନିଦର ଫସଲ କେତେ !
ଆଉ ଭିଜାନା କଇଁକୁ ତୋ' ପ୍ରେମ ଜ୍ୟୋସ୍ନାରେ
ଶୋଇବାକୁ ଦେ ଟିକେ ତାକୁ ନିରୋଳାରେ
ବାଦଲ ଉହାଡ଼ରେ ଟିକେ ତୁ ଲୁଚିଯା
ଯା', ତୁ ବି ଟିକେ ସେଇଠି ଶୋଇଯା !
ଆକାଶ ଅଗଣାରେ ତୁ ଏକ ବୋଇତ
ନେଇଯା ମୋତେ ସ୍ବପ୍ନରାଇଜକୁ ରେ ଜହ୍ନ
ଚୁନାଚୁନା ତାରାମେଳେ
ଭରିଦିଏ ଆଖିରେ ମୁଁ ଆଖିଏ ସ୍ବପ୍ନ l
ଚତୁର୍ଦ୍ଦଶୀ ଚାନ୍ଦରେ
ତୋ' ଭିତରେ କଣ ଏତେ କଳଙ୍କ
ନା ମାଆ ଲଗେଇଛନ୍ତି କଜ୍ଵଳଗାର
ଲାଗି ନ ଯାଉ ବୋଲି କାହାର ନଜର !
ଆଃ ! ଆଜି ପୂର୍ଣ୍ଣିମା
ଲାଗୁଛୁ ତୁ ସ୍ୱୟଂସମ୍ପୂର୍ଣ୍ଣl
ଉଛୁଳି ପଡୁଛି ସତେକି ଦେଖ
ଭରା ପିଆଲାରୁ ତୋ' ଜୋଛନା l