ଦେବାରେ କ'ଣ ଆନନ୍ଦ ନ ଥାଏ

ଚନ୍ଦ୍ରକୁ ମାଗିଲି ଶୀତଳ ଜୋଛନା 

    କଇଁରାଣୀ କରେ ନାଇଁ 

ସାଗରକୁ ନୀଳ ଢେଉଟା ମାଗିଲି 

    ମୁହଁ ମୋଡି ଦେଲା ନଈ 

ଦେବାରେ କି ସୁଖ ନାହିଁ, 

ଯିଏ ଯାହାପାଇଁ ତା ପାଇଁ |

ରାତିକୁ ମାଗିଲି ନିଦ ଟିକେ ଦେ 

    ଯିବି ନିଃଶବ୍ଦ ରେ ଶୋଇ

ସପନ ଟା ତାକୁ ଚୋରାଇ ନେଲାଣି 

    . ନିଦ ହଜିଗଲା କାହିଁ !

ଦେବାରେ କି ସୁଖ ନାହିଁ, 

ଯିଏ ଯାହାପାଇଁ ତା ପାଇଁ |

ଘୁଙ୍ଗୁର ଛନ୍ଦ ରେ ତାଳ ମୁଁ ମାଗିଲି 

    ପାଉଁଜି ଯାଏ ଲାଜେଇ 

ବଇଁଶୀ ର ସ୍ୱର ରାଧା କୁ ଅଡୁଆ 

    କୁଞ୍ଜବନେ ଯାଏ ଧାଇଁ 

ଦେବାରେ କି ସୁଖ ନାହିଁ, 

ଯିଏ ଯାହାପାଇଁ ତା ପାଇଁ |

ହାତପାତି ଧରା ମାଗେ ଆକାଶ କୁ 

    ଦେବାକୁ ବାରି ଝରାଇ 

ପବନ ମଉନେ ଗୁମାନ କରିଛି 

    ରହୁଛି ମୁହଁ ଶୁଖାଇ 

ଦେବାରେ କି ସୁଖ ନାହିଁ, 

ଯିଏ ଯାହାପାଇଁ ତା ପାଇଁ |

ଫୁଲ କୁ କହିଲି ପାଖୁଡା ବିଛେଇ 

    ଦେବାକୁ କୋଳେ ଶୁଆଇ 

ଅଳି ସୁକୁମାରୀ ଭାବୁଛି ମୁଁ କାଳେ 

    ନେବି ତା ମଧୁ ଚୋରାଇ

ଦେବାରେ କି ସୁଖ ନାହିଁ, 

ଯିଏ ଯାହାପାଇଁ ତା ପାଇଁ |

ମୁଁ ମାଗିଥିଲି ତୋ ମନ ଠିକଣା 

    ମାଗି ମାଗି ଦେଲୁନାହିଁ 

ମୁଁ କିନ୍ତୁ ଦେବାକୁ ଚାହିଁବସିଅଛି 

   ମୋ ପ୍ରେମ ର ଠିକଣା ସହି 

ଦେବାରେ ତ ସୁଖ ଏଇ, 

ତୁହି ମୋପାଇଁ ମୁଁ ତୋପାଇଁ |