ଡାକ ଦିବସରେ ପଦେ

ଅକ୍ଟୋବର 10 ଡାକ ଦିବସରେ

          ମନେପଡେ ଚିଠି କଥା

ଚିଠି ଟିଏ ପାଇଁ କେତେ ଆବେଗତା

          କେତେ ଯେ ଗହନ ବ୍ୟଧା ।

କି ଇଣ୍ଟରନେଟ ଯୁଗ ଆସି ହେଲା

           କରେ ଡାକବାଲା କାମ

ଇ-ମେଲ, ମେସେଜ ,ହ୍ବାଟସ୍ଅପ ଟା

           ଚିଠିର ବିକଳ୍ପ ନାମ ।

କବାଟ କୋଣରୁ କୁଳବଧୂ ଆଉ

           ଚାହୁନି ଡାକ ବାଲାକୁ

ମେସେଜ୍ ଟେ ଲେଖି ବୁକୁତଳ କଥା

            ପଠାଏ ପ୍ରିୟ ଜନକୁ ।

ସ୍ମାର୍ଟ ଫୋନରେ ବିଭୋର ସଭିଏ

           କିଏ ପଚାରଇ ଚିଠି

ଡାକବାଲାର ତ ସାଇକେଲ ଘଣ୍ଟି

           ଆଉ ନ ଶୁଭଇ ନିତି ।

ଚିଠିର ବାସ୍ନା ହଜିଯାଇଅଛି

            ତଥାପି ପଡିଛି କନା

 କର୍ପୂର ସିନା ଉଡିଯାଇଅଛି

             ଶୁଣାଏ ଅନ୍ତର୍ବେଦନା ।

ସରଗରେ ଥାଇ କବି "କାଳିଦାସ"

           ମନେ ମନେ ଭାବୁଚନ୍ତି

 "ମେଘଦୂତ" ଆଉ ଲେଖୀନ ହୁଅନ୍ତା

          ଏ ଯୁଗରେ ଯଦି ଥାନ୍ତି ।