ଦାୟିତ୍ବ

      

ସବୁରି ଦାୟିତ୍ବ ବୁଝୁ ବୁଝୁ ବାପା

ଅଣ୍ଟା ହୋଇଗଲା ବଙ୍କା,

ପକେଟ ଗୋଟାକ ଖୋଲା ହୋଇଗଲା

ସରିଗଲା ସବୁ ଟଙ୍କା |୧|

ସ୍ତ୍ରୀ ମାଗୁଥିଲା ସୁନା ଗହଣାକୁ

ବେକ ଦେଖାଇବ ବୋଲି,

କେବେ ହେଲେ ସିଏ ଭାବି ପିରିଲାନି

ପକେଟଟା ପୂରା ଖାଲି |୨|

ପୁଅ କହୁଥିଲା ବହି କିଣିବାକୁ 

ଖରଚ ପକେଟ ମନି,

ଝିଅର ମେକପ ବାକସ ଖରଚ

ଗୋଡ଼ାଇ ମାରୁଛି ଶନି |୩|

ଘରର ଦାୟିତ୍ବ ମହଙ୍ଗା ପରିବା

ନହେଲେ ରୋଷେଇ ଫାଙ୍କା,

ସବୁ ଦେଖି ଦେଖି ମୁଣ୍ଡଟା ପାଗଳ

ମୁହଁ ହୋଇଯାଏ ବଙ୍କା |୪|

ସାଇକେଲ ଧରି ବାହାରି ପଡ଼ିଲେ

ପବନ କିଣିବା ପଡ଼େ,

କେହି ବୁଝନ୍ତିନି ବାପାର ମରମ

ହୃଦୟ କାହାର କେଡ଼େ |୫|

ବାପା ହୃଦୟଟା ବିରାଟ ଆକାଶ

ନାହିଁ ତାର ସୀମାରେଖା,

ଆଦର ସେନେହ ଭରପୂର ସେଠି

ଅଭାବ ନାହିଁଟି ଦେଖା |୬|

ମନ ଗହନରେ ଦାୟିତ୍ବର ବୋଝ

ତଥାପି ଅଳସ ନାହିଁ,

ଅଳସପଣଟି ଦୂରେଇ ଯାଇଛି

କେଉଁ ଦିନୁ ପତା ନାହିଁ ୭|

ଜଗତର ପିତା ପରମ ବାନ୍ଧବ

ସବୁରି ଦାୟିତ୍ବ ନେଇ,

ଆଖିପତା ତାଙ୍କ ପଲକ ପଡ଼େନି

ସବୁ ଦୁଃଖ ବୁଝି ନେଇ |୮|

ବାପାଟି ଯେପରି ପରିବାର ପାଇଁ

ଦାୟିତ୍ବର ମହାଝର,

ସାରା ଜଗତର ଜଗନ୍ନାଥ ପ୍ରଭୁ

ଦାୟିତ୍ବର ସମାହାର |୯|

ନିଜର ଦାୟିତ୍ବ ନିଜେ ବୁଝିନେବା

ତାହେଲେ ହୋଇବା ସୁଖି,

ପରର ଉପରେ ବୋଝ ହୋଇଗଲେ

ଜୀବନରେ ବଡ଼ ଦୁଃଖି |୧୦|