Library
Profile
ଚିରିଦିଅ ସେଇ ଫର୍ଦ୍ଦ
ଚିରିଦିଅ ସେଇ ଫର୍ଦ୍ଦ
ଯେବେ ଆସିଥିଲି ଜୀବନେ ତୁମର
ଆଜି ଚିରିଦିଅ ସେଇ ଫର୍ଦ୍ଦ
କାଢି ଦିଅ ସେଇ ହୃଦୟ ଭିତରୁ
ଆଜି ହେବନି ଆଉ ସେ ଦର୍ଦ
ନିବେସ କରନି ନୟନ ମୁକୁତା
ଆଜି କରନି ଆଉ ସେ ଖର୍ଚ୍ଚ
ବନ୍ଧକ ରଖନି ପ୍ରେମକୁ ତୁମର
ଆଜି ବଢ଼ାନି ଆଉ ସେ କର୍ଜ
ମଙ୍ଗଳ ମାନସି ଓଷା ବ୍ରତ କରି
ଆଜି ଯାଅନି ଆଉ ସେ ତୀର୍ଥ
ପଡ଼ିଥିଲ ଯେଁଉ କୁହୁଡି ଉଲ୍ଲାସେ
ଆଜି ଖୋଳନି ଆଉ ସେ ଗର୍ତ୍ତ
ବିଜୟ ହୁଅନି ସମୟ ସୁଅରେ
ଆଜି ଜିତନି ଆଉ ସେ ଧର୍ମ
ଗାଅନି ଗୁଣ ଗାରିମା ଦାଣ୍ଡରେ
ଆଜି କରନି ଆଉ ସେ ଗର୍ବ
ଅପେକ୍ଷା କରନି ଯୋଡା ଆଷାଢ଼କୁ
ଆଜି ଗଣାନି ଆଉ ସେ ବର୍ଷ
ଭୋକିଲା ରୁହନି କ୍ଷୀର ସର ଦେଇ
ଆଜି ପାଳନି ଆଉ ସେ ସର୍ପ
ପ୍ରାସାଦ ଭାବନି ବାଲିଘର ଟିଏ
ଆଜି ଗଢନି ଆଉ ସେ ଦୂର୍ଗ
ବାଖାଣନି ଆଉ ବ୍ୟଙ୍ଗ ଗପ ସବୁ
ଆଜି ବୁଝାନି ଆଉ ସେ ମର୍ମ
ଶୁଭେଚ୍ଛା ଦିଅନି ଜନମ ଦିନର
ଆଜି ପାଳନି ଆଉ ସେ ପର୍ବ
ବଞ୍ଚି ପାରିବନି ମୋରି ବ୍ୟତୀତ
ଆଜି ରଖନି ଆଉ ସେ ସର୍ତ୍ତ
ବିମୁଗ୍ଧ ହୁଅନି ରକ୍ତିମ ଆଶାରେ
ଆଜି ଉଁଆନି ଆଉ ସେ ଅର୍କ
ଗାଉଥିଲ ଯେଉଁ ପ୍ରେମର କବିତା
ଆଜି ଭୁଲିଯାଅ ସବୁ ଅର୍ଥ
ଯେବେ ଆସିଥିଲି ଜୀବନେ ତୁମର
ଆଜି ଚିରିଦିଅ ସେଇ ଫର୍ଦ୍ଦ l
