ଛୋଟ ମୋର ଗାଆଁଟି
ଛୋଟ ମୋର ଗାଆଁଟି
ଆମ ଗାଆଁର ନାମ ଶିବପୁର,
ବ୍ଲକ୍ ତାହାର ଧାମନଗର
ଭଦ୍ରକ ଅଟଇ ଜିଲ୍ଲାର ନାମ,
ଓଡିଶା ପ୍ରଦେଶ କାଳିଆ ଧାମ ।
ବାସସ୍ଥାନ ଏଠି ଶିବଙ୍କର,
ତେଣୁ ଗ୍ରାମର ନାମ ଶିବପୁର ।l
ପୂରୁବ ଦିଗେ ତାଙ୍କ ମନ୍ଦିର ,
ନାମଟି ହେଉଛି ଶିବେଶ୍ବର ।
ବରୁଣେଇ ମାଆ ତାଙ୍କରି ପାଶେ,
ପୂଜନ୍ତି ସଭିଏଁ ମନ ହରଷେ
ପାଖେଛନ୍ତି ପୁଣି ବୀର ହନୁମାନ,
ତାଙ୍କ ପାଖେ ସବୁ ଭକ୍ତ ସମାନ ।
ଉତ୍ତର ଦିଗରେ ତାରିଣୀ ମାଆ,
ବିପଦେ ଆପଦେ ଆମକୁ ସାହା
ତାଙ୍କପାଖେ ବାବା ସିଦ୍ଧେଶ୍ଵର ,
ଅତିପ୍ରିୟ ସିଏ ଭକତଙ୍କର ।
ଗାଆଁ ମଝିରେ ସପ୍ତାଘର ,
ପୂଜା ପାଆନ୍ତି କଳା ଠାକୁର
ଦୋଳପୂର୍ଣ୍ଣମୀ ଯେବେ ଆସଇ,
ନଅଦିନ ତାଙ୍କ ଲୀଳା ଚାଲଇ ।
ଗାଆଁଟି ଅଟେ ଭାରି ସୁନ୍ଦର,
ଲୋକେ ରୁହନ୍ତି ତିନି ଜାତିର
ବ୍ରାହ୍ମଣ କ୍ଷତ୍ରିୟ ବୈଶ୍ୟ ଘର,
ମୋଟ ସତୁରି ପରିବାର ।
ବିଦ୍ୟାଳୟଟି ଗାଆଁ ମୁଣ୍ଡରେ,
ପିଲାଏ ପଢନ୍ତି ଯାଇ ସେଠାରେ
ତା'ପାଖରେ ପୁଣି ଖେଳ ପଡିଆ,
ପିଲାଏ ଖେଳନ୍ତି ମାରନ୍ତି ଡିଆଁ ।
ଅନେକ ପରବ ବାର ମାସରେ,
ପାଳନ୍ତି ସଭିଏଁ ଖୁସି ମନରେ
ରଜ ଶିବରାତ୍ରି ଦୋଳଯାତରା,
ତା'ସାଙ୍ଗକୁ ପୁଣି ରଥଯାତରା ।
ପଣାସଙ୍କରାନ୍ତି ଗଣେଶ ପୂଜା,
ଖୁସିରେ ସଭିଏଁ କରନ୍ତି ମଜା
ଶିକ୍ଷକ ସୈନିକ ଡାକତର,
ରାଜନେତା ପୁଣି କଳାକାର ।
କୃଷକ ଶ୍ରମିକ ବ୍ୟବସାୟୀ ,
ଏଠାରେ ସଭିଙ୍କ ଜନ୍ମ ଅଟଇ
ଆମ ଗାଆଁଟି ଭାରି ସୁନ୍ଦର,
ସଭିଏଁ ଲାଗନ୍ତି ଭାରି ନିଜର
ଆମ ଗାଆଁର ନାମ ଶିବପୁର ।