ଚାରିକାନ୍ଥର ଭବନ

ଚାରିକାନ୍ଥର ଭବନ 

ଚାରିଦିନର ଜୀବନ

ମୁଠେଇ ଧରିଥା ଆଞ୍ଜୁଳାଏ ସପନ

ବୋଉର ଅତୁଲ୍ୟ ସରଧା ସ୍ନେହ

ଶୌଶବର କୋମଳ ସ୍ୱତନ୍ତ୍ରତାର ମୋହ

ବାନ୍ଧିରଖିଥା ମାନସ ପଟଳେ ଯତନ ।୧

ହସିବାର ଆସର ଖୋଜିନେ

କାରଣ ଜୀବନ କନ୍ଦେଇବାକୁ

ଫନ୍ଦି ଫିକର ରଖିଛି ଅସୁମାରୀ

ହସେଇବାର ବାହାନା ବାଛିନେ

କାରଣ ଜୀବନ ଲହୁଲୁହାଣ

କରିବାକୁ ଫାସ ବସେଇଛି ତିଆରୀ ।୨

ମୁରୁକେଇବାର ରାସ୍ତା ଖୋଜିନେ

କାରଣ ଜୀବନ ଦୁଃଖ ଦେବାକୁ

ଜାଲ ମେଲିଛି ବିସ୍ତାରୀ

ହସ ବାଣ୍ଟିବାକୁ ବାହାନା ବୁଣିଦେ

କାରଣ ତାଳିପକା ଜୀବନ 

ଘନ ଘନ ଲୋତକ ଝରେଇବାକୁ 

ମଉକା କରିଛି ସତ୍କାରୀ ।୩

ମୁଚୁକେଇବାକୁ କଳ୍ପନା କରିନେ

କାରଣ ପଘାରେ ବନ୍ଧା ଜୀବନ

ସମସ୍ୟା ଘେରକୁ ନିତ୍ୟ ଠେଲୁଛି

ପ୍ରତାରଣାରେ ଅଧାମରା 

ଗୁଣୁଗୁଣେଇବାକୁ ଆସ୍ଥାନ ଖୋଳିଦେ

କାରଣ କାମଚଳା ଜୀବନ

ଲୁହରେ ଆକ୍ତାମାକ୍ତା କରୁଛି

ଅସାର ସଂସାର ସାରା ।୪

ହସ ବୁଣିବାକୁ ମାନସ ମନ୍ଥନ କରୁଥା ନିତ୍ୟ

ସମସ୍ୟା ବହୁଳ ଜୀବନେ 

ଖୁସି ଝଲସେଇବାକୁ ଝୁଣ୍ଟି ଚାଲିଥା ନିରୋଳାରେ ସତ୍ୟ

ମିଛ ମାୟା ସଂସାର କାନେ ।୫

କାରଣ

ଚାରିକାନ୍ଥର ଭବନ

ଚାରିଦିନର ଜୀବନ

ଗଣ୍ଠିଧନ ତୋର ବିଭୁପଦ ଧ୍ୟାନ 

ପାରି କରିବ ଜୀବନ ନଉକା

ଭବ ସାଗରୁ ତାରିବ ଏକା

ମୋକ୍ଷ ମାର୍ଗର ବତୀଘର କେତନ ।୬