ବ୍ୟଙ୍ଗ କବିତା : ପର ଦରବ ଭାରି ସୁନ୍ଦର

ପର ଦରବ ଭାରି ସୁନ୍ଦର ମହମହକି ବାସେ,

ପର ସଂପତ୍ତି ଅଳପ ଥିଲେ ଅଧିକ ହୋଇ ଦିଶେ ।

ପରର ସୁଖ ଦେଖିଲେ ମନେ ଲାଗି ଯାଉଛି ନିଆଁ,

ପରର ଦୁଃଖ ଦେଖିଲେ ସିନା କହନ୍ତି ଆହା ଆହା ।

ପର ପିଲାଟା ପଢିଲେ ଭଲ ମୋ ପିଲା ଖାଏ ମାଡ଼,

ପର ଝିଅଟା ସୁନ୍ଦରୀ ହେଲେ ଜଳି ଉଠେ ମୋ ହାଡ଼ ।

ପରଘର କି ଗାଡ଼ିକୁ ଦେଖି ମନଟା ହାଇଁପାଇଁ,

ପର ମଣିଷ କଷ୍ଟ କି ଶ୍ରମ ଆଖିକୁ ଦିଶେନାହିଁ ।

ପର ଘରର ଶାଗ ପଖାଳ ଭାରି ସୁଆଦ ଲାଗେ, 

ପର ବାଡ଼ିରେ ଫୁଲକୁ ଦେଖି ଈଶ୍ୱର ଭକ୍ତି ଜାଗେ ।

ପର ଗାଈର କ୍ଷୀର ପତଳା ବଦଳ ଭାରି ଦୁଷ୍ଟ,

ପର କୁକୁର ଭୁକେନା ଯଦି ହୁଏ ସେ ଶାନ୍ତ ଶିଷ୍ଟ ।

ପର ପିଣ୍ଡାରେ ବସି ଗପିଲେ ସୁଖରେ ଦିନଯାଏ ,

ପରଲୋକଙ୍କୁ କରିଲେ ନିନ୍ଦା ମନ ହାଲୁକା ହୁଏ ।

#ସିଧାକଥା-୩୮