ଭାଇ ହାତରେ ରାକ୍ଷୀ

ମସ୍ତକରେ ଦେଲା ଅରୁଆ ଚାଉଳ

କାନରେ ଖୋସିଲା ଫୁଲ, 

କପାଳେ ହଳଦୀ ଚନ୍ଦନର ଟିକା, 

ହାତେ ଧରି ପୂଜା ଥାଳ ।

ଠାକୁରଙ୍କୁ ଅଳି କରୁଛି ଭଉଣୀ

ରାକ୍ଷୀ ବାନ୍ଧି ଭାଇ ହାତେ, 

ଆପଦେ ବିପଦେ ସୁଖରେ ଦୁଃଖରେ

ସାହା ହେଉଥାନ୍ତୁ ତୋତେ ।

ତୋ ଦୀର୍ଘ ଜୀବନ କାମନା କରୁଛି 

ଭବିଷ୍ଯ ହେଉ ଉଜ୍ଜ୍ବଳ, 

ସଂପର୍କ ଛନ୍ଦରେ ବାନ୍ଧିଛି ମୁଁ ତୋର

ହାତରେ ରେଶମୀ ଡୋର ।

ସ୍ନେହର ଡୋରରେ ଗୁନ୍ଥିଛି ତୋ ପାଇଁ

ମମତା ଫୁଲର ମାଳି, 

ଉନ୍ନତି ପ୍ରଗତି ମାଳିରେ ଦେଇଛି

ଭରସା ବିଶ୍ବାସ ଭରି ।

ପରମ୍ପରା ଇଏ ପ୍ରେମ ଆଦରର

ପବିତ୍ର ରକ୍ଷା ବନ୍ଧନ, 

ଇତିହାସ ଆଉ ପୁରାଣ ଶାସ୍ତ୍ରରେ

ହୋଇଛି ଯାର ବର୍ଣ୍ଣନ ।

ସେହ୍ନଭାବ ଆଉ ଆନ୍ତରିକତାର

ସାକ୍ଷୀ ଏ ମହାନ୍ ପ୍ରଥା, 

ଭାଇ କଥା ଦିଏ ରଖିବି ନିଶ୍ଚୟ

ଭଉଣୀ ରାକ୍ଷୀ ମାନ୍ଯତା ।

ସରାଗେ ଭଉଣୀ ରାଣ ଦେଇ କହେ

ମୋତେ କେବେ ଭୁଲିବୁନି, 

ତୁ ମୋର ସଙ୍ଗୀତ ମୁଁ ପରା ତୋ ସ୍ବର

ସଂପର୍କ ଆମ ରାଗିଣୀ ।

ଉପହାର କିଛି ଲୋଡା ନାହିଁ ମୋର

ସଂପର୍କ ଅତୁଟ ରହୁ, 

ଯୁଗ ଯୁଗ ଧରି ରାକ୍ଷୀର ଚମକ

ତୋ ହାତରେ ଶୋଭା ପାଉ ।