ଅମୃତମୟ

କେବେ କେବେ ପତ୍ନୀର ମନ-ହୃଦୟରେ ଉଙ୍କି ମାରି ଦେଖ

ପାଶେ ଶୋଇଥିବା ଗାର୍ଲଫ୍ରେଣ୍ଡ ମିଳିଯିବ

ସ୍କୁଲ କଲେଜ ବେଳର ଏକପାଖିଆ ପ୍ରେମିକା ଦିଶିବ

ପଡୋଶୀ ଭାଉଜର ଚିକ୍କଣ ଚାକ୍କଣ ଶିଉଳୀ ଅଣ୍ଟା ବି ପାଇବ

ନଈ ଆରପଟ କନକ ଗୋରୀକୁ ଛୁଇଁ ପାରିବ ।

କେବେ କେବେ ପୁଅ ସହ ସାଙ୍ଗ ହୋଇ ଦେଖ

ଯୌବନ ପୁଣି ଚେଇଁ ଉଠିବ ଚଉବନରେ

ଅପହଞ୍ଚ ସ୍ୱପ୍ନସବୁ ଲାଗିବ ହାତମୁଠାରେ 

ଆଞ୍ଜୁଳା ଆଞ୍ଜୁଳା ମାଦକତା ଭୋଦୁଅ ଖରାରେ

ଶୀତ ବସିବ ମୀତ ବିଗତ ମିଠା ଅନୁଭବରେ ।

କେବେ କେବେ ଜୀବନପଥରେ

 ପ୍ରଥମ ସଖା- ସାଙ୍ଗକୁ ମନେପକାଅ

ସର୍ବପ୍ରଥମେ ମା' ମନେ ପଡ଼ିଯିବ

ବଦଳା ସଂପର୍କ ଋତୁଚକ୍ରେ ହସହସ ମୁଁହ ଦିଶିଯିବ

ଆକାଶ ଠାରୁ ବିଶାଳ ତା'ର ତ୍ୟାଗ ବଳିଦାନ ଗଣିହେବ

ଧରଣୀସମ ସର୍ବସଂହା ସ୍ନେହ ପାରାବାର ବୁଡ଼ି ହେବ ।

କେବେ କେବେ ବୁଢା ବାପ ସହିତ ଦି- ଚାରିପଦ ଗପିଦିଅ

ଜ୍ଞାନୀ ସଖା-ସୋଦର ଘରେ ହିଁ ପାଇବ

ବିଜ୍ଞାନୀ ଅନୁଭବି ତିନିମୁଣ୍ଡିଆ ପାଖରେ ଦିଶିବ

ଅନୁସନ୍ଧାନୀ ପାକଳାବାଳିଆ ସମର ସୈନିକ ଭେଟିବ ।

କାହିଁ କରୁଛ ହେ ଗୋଲକଧନ୍ଦା

କାହିଁ ଧାଉଁଛ ହେ ଅଜଣାପନ୍ଥା 

ଖସଡା ଅମଡ଼ାବାଟ ଯେ ଅମା ଅନ୍ଧାର

ଆଗରେ ମୁଚୁକୁନ୍ଦ ହସ ପଛେ ତୀକ୍ଷଣ ଛୁରିକା ପ୍ରହାର ।

କିସ ପାଇଁ ଖୋଜୁ ସାଂଗ ମେଳେ ସଂପର୍କ

ନା ସଂପର୍କରେ ସାଙ୍ଗ ଖୋଜୁ

କିସ ପାଇଁ ଯୋଡୁ ସାଥି ସାଥେ ଵନ୍ଧୁତ୍ୱ

ନା ବନ୍ଧୁତ୍ଵରେ ସାଥି ଖୋଜୁ ।

ନିଜ ପରିବାର ପରା ସୁଖମୟ ସୁଧାମୟ ମଧୁମୟ

ହସିଲା ଫୁଟିଲା ବଂଚିଲା ଆପଣାର କର ଭାବ ବିନିମୟ ।

ବେଳେ ବେଳେ ଏମିତି ଭାବିଲେ

ବେଳେ ବେଳେ ମଣିଲେ ଚନ୍ତିଲେ 

ସବୁ ବେଳେ ହେବହିଁ ଅମୃତମୟ ।