ଅଜା ଯାଇଥିଲେ ସିନେମା ଦେଖି
ଅଜା ଯାଇଥିଲେ ସିନେମା ଦେଖି
ବୁଢ଼ା ବୟସରେ କରି ସଉକି,
ସ୍ନୋ, ପାଉଡର, ଅତର ମାଖି
ମାହେନ୍ଦ୍ର ବେଳାରେ ସଜବାଜ ହୋଇ
ଅଜା ଯାଇଥିଲେ ସିନେମା ଦେଖି ।
ଫିନିଫିନି ଧୋତି, ପଞ୍ଜାବୀ ପିନ୍ଧି,
ଟାଇଟନ ଘଡ଼ି ହାତରେ ବାନ୍ଧି
ପାକଲା କେଶକୁ କଳା କରି ପୁଣି
ପାକୁଆ ପାଟିରେ ପାନକୁ ଯାକି ।
ଅଜା ଯାଇଥିଲେ ସିନେମା ଦେଖି...
ପାଦରେ ସେ ଦାମୀ ଚପଲ ମାଡ଼ି,
ହାତେ ଧରିଥିଲେ ବଙ୍କୁଲୀ ବାଡ଼ି
ପଲିଥିନ ମୁଣି କାନ୍ଧେ ଟାଙ୍ଗି, ଆଉ
ଚାଳିଶା ଚଷମା ଆଖିରେ ଯୋଖି ।
ଅଜା ଯାଇଥିଲେ ସିନେମା ଦେଖି...
ସବୁଠୁ ଦାମିକା ଟିକେଟ ନେଇ,
ସିନେମା ହଲରେ ପଶିଲେ ଯାଇ
ଆରମ୍ଭିଲେ ସେଠି ବକ୍ତୃତା ତାଙ୍କର
ଶୁଣି ସବୁଲୋକ ଗଲେ ଚମକି ।
ଅଜା ଯାଇଥିଲେ ସିନେମା ଦେଖି...
କହିଲେ-"ହଅକ ପଇସା ଦେଇ,
ପଛରେ କାହିଁକି ବସିବି ମୁହିଁ
ମଜାଟା ତୁମର ନିକାଲି ଦେବି ମୁଁ
କହୁଅଛି ଛାଡ଼ ଆଗ ଚଉକି ।
ଅଜା ଯାଇଥିଲେ ସିନେମା ଦେଖି...
ଫିଟିଲା ପରଦା ବାଜିଲା ବାଜା,
ସବା ଆଗେ ବସି ଦେଖିଲେ ଅଜା
କିଏ ସେ ହସୁଛି, କିଏ ସେ କାନ୍ଦୁଛି,
କିଏ ବା ନାଚୁଛି ଗୀତ ଗାଇକି ।
ଅଜା ଯାଇଥିଲେ ସିନେମା ଦେଖି...
ସେତିକିବେଳକୁ ଖଳନାୟକ,
ଆସି ଜଣଙ୍କର ମୋଡ଼ିଲା ବେକ
ଅଜା ତ ଆମର ଦୟାର ସାଗର
ପାରିଲେନି ସହି ଏ ଦୃଶ୍ୟ ଦେଖି ।
ଅଜା ଯାଇଥିଲେ ସିନେମା ଦେଖି...
ହୃଦୟ ତାଙ୍କର ହୋଇଲା ହାଣି,
ସଙ୍ଗେ ସଙ୍ଗେ ବଙ୍କା ବାଡ଼ିକୁ ଆଣି
ଖଳନାୟକକୁ ପିଟିଲେ ପାହାରେ
ସିନେମା ପରଦା ଗଲା ଯେ ଫାଟି ।
ଅଜା ଯାଇଥିଲେ ସିନେମା ଦେଖି...
କହିଲେ-"ସେଇଟା ଏଡ଼ିକି ଦୁଷ୍ଟ,
ବିନା ଦୋଷେ ଆନେ ଦେଉଛି କଷ୍ଟ
ଆଚ୍ଛା ପାନେ ତ ମୁଁ ଦେଇଛି ତାହାକୁ
ଖୁସି ହେବେ ସର୍ବେ ମୋ ମୋ କାମ ଦେଖି ।
ଅଜା ଯାଇଥିଲେ ସିନେମା ଦେଖି...
ଦେଖି ଅଜାଙ୍କର ଏମିତି କାମ,
କିଛି ଦରଶକ ହୋଇ ଗରମ
ଗରଜନ କରି ଅଜାଙ୍କୁ ଆମର
ଉତ୍ତମ, ମଧ୍ୟମ ଦେଲେ ଯେ ସେକି ।
ଅଜା ଯାଇଥିଲେ ସିନେମା ଦେଖି...
ଖାଇ ସଭିଙ୍କଠୁ ଏମିତି ମିଠା,
ଅଜାଙ୍କର ତେଣେ ବୁଡ଼ିଲା ଚେତା
ଜାଣିପାରିଲେନି କେଣେ ଗଲା ଛତା,
କେଣେ ଗଲା ବାଡ଼ି କେଣେ ମୁଣିଟି ।
ଅଜା ଯାଇଥିଲେ ସିନେମା ଦେଖି...
ଚେତାଟା ଫେରିଲା ଯେତିକି ବେଳେ,
ଦେଖିଲେ ସେ ବଡ଼ ମେଡିକାଲରେ
ଚାରିପାଖେ ଗାଆଁ ଲୋକଙ୍କର ଭିଡ଼
ନାତି ନାତୁଣୀଏଁ କରନ୍ତି ପାଟି ।
"ଅଜା ଯାଇଥିଲେ ସିନେମା ଦେଖି।