ଆଶାର ଆଲୋକ

ଆଶା ପ୍ରତ୍ୟାଶାରେ ମାନବ ଜୀବନ

ସମ୍ପର୍କ ସାଥିରେ ଚାଲଇ ନିତି

ଉତ୍ତମ ସଂସ୍କାର, ଉତ୍ତମ ବିଚାର

ଆଲୋକ ପଥରେ କରାଏ ଗତି ।

ପୁରୁଣା ସ୍ମୃତିକୁ ଉଖାରି ଉଖାରି

ଆଶା ଖୋଜି ବୁଲେ ନୂତନ ଦିଶା

ହାରିଛି ଜିତିଛି କେତେ କରମରେ

ଅନୁଭବ ବାନ୍ଧିଦିଏ ଭରସା ।

ବିଶ୍ବାସ ତୋଳଇ ନବ ସମ୍ଭାବନା

ଚିନ୍ତା ଚେତନାକୁ କରି ଜାଗ୍ରତ

ଦିଗନ୍ତ ପ୍ରସାରୀ ଆଶାର କିରଣ 

ସଫଳତା ପାଇଁ ଦେଖାଏ ପଥ ।

ସୁଖଦୁଃଖ ତୋଳି ଆଗକୁ ବଢ଼ଇ

ଘାତପ୍ରତିଘାତେ ଭାଙ୍ଗି ନପଡି

ପୂର୍ବ ସ୍ମୃତି ଭରେ ଉତ୍ସାହ ପ୍ରେରଣା

ଯେତେ ନୂତନତା ପାରଇ ଭିଡ଼ି ।

ଆଶା ବିନା କେହି ଜୀଇଁଛି ଜୀବନ

ଦେଖି ପାରିଛି କି ମରତେ କିଏ

ସିଏ ପରା ପ୍ରତି ହୃଦୟର ଗତି

ଲକ୍ଷ୍ଯ ପୂରଣରେ ଆଗକୁ ଧାଏଁ ।

ଆଶାର ଆଲୋକ ଦିଶେ ଜକଜକ

ଯେତେ ତ୍ରୁଟିସବୁ ସୁଧାରି ନେଇ

ଅସୁମାରି ସେହି ହୀରକର ଜ୍ୟୋତି

ଜୀବନାକାଶକୁ ଭରି ରଖଇ ।