ଆଶା ଫୁଲ ଵିଞ୍ଚି ଦେଇ।

ଫଗୁଣ ଆସିଛି

   ବଉଳ ବାସରେ

      କୋଇଲି କୁହୁରେ

         ମଳୟ ପବନ ନେଇ

 ଫଗୁଣରେ ନେସା

      ହସଟି ତୁମର

        ଝରେ ମଧୂଝର

          ଦେଖିବାକୁ ମିଳୁନାହିଁ ।

ଝରକା ସେପଟେ

     ଚନ୍ଦ୍ରମା ଲୁଚିଛି

        ଅଭିମାନ କରି

         କଳାମେଘ କୋଳେ ଯାଇ

ତୁମେ ବି ଲୁଚିଛ

      ଅଜଣା ରାଇଜେ

       ରାଗ ରୋଷେ କିବା

           ଠିକଣା ହଜାଇ ଦେଇ।

ମନ ବେଳାଭୂମୀ

      ଶୁଖିଲା ପଡିଛି

        ବରଷ ବିତିଛି

           ଜୁଆର ଆସୁନି ଡେଇଁ

ସେମିତି ଦିଶୁଛି

       ପାଦଚିହ୍ନ ତୁମ

         ଚକ୍ ମକ୍ ହୋଇ 

            ସ୍ମୃତିକୁ ଉଖାଡି ଦେଇ ।

ଫେରିଆସ ତୁମେ

      ଫଗୁ ରଂଗ ନେଇ

         ଆଞୁଳିରେ ଭରି

           ପ୍ରୀତିମଧୂ ହସ ନେଇ

ଅନାଇ ରହିଛି

       ଫେରିବା ବାଟକୁ

          ଭଂଗା ହୃଦୟରେ

            ଆଶାଫୁଲ ବିଞ୍ଚି ଦେଇ ।