ଆଜି ଏ ସାଧାରଣତନ୍ତ୍ର ଦିବସେ

ଗୁଳି ଗୋଳା ଖାଇ ରକତ ନିଗାଡ଼ି

ନିଜ ପାଇଁ ନିଜେ ସଂବିଧାନ ଗଢ଼ି

ଦେଶ ଜାତି ପାଇଁ ଦେଇ ଗଲେ ବାଢ଼ି

        ଅମର ଏ ମହାପୁରୁଷେ ,

   ଆଜି ଏଇ ସାଧାରଣତନ୍ତ୍ର ଦିବସେ ।

ଅନୁଭବ ହୁଏ ଅତୀତର ବ୍ୟଥା

ବୁକୁଫଟା ଏଇ ସ୍ବାଧୀନତା କଥା

ଭାରତ ମାତାକୀ ଜୟ ଧ୍ବନି ଯେବେ

         ଦୂରୁ ଭାସି ଭାସି ଆସେ ,

   ଆଜି ଏଇ ସାଧାରଣତନ୍ତ୍ର ଦିବସେ ।

ଜାତୀୟ ସଂଗୀତ ଗୁଣୁଗୁଣୁ ହେଇ

ତ୍ରିରଙ୍ଗା ପତାକା ଉଡ଼େଇ ଉଡ଼େଇ

ସ୍ବାଧୀନ ଭାରତ ଭବିଷ୍ୟତ ବୋଲି

       ଅବୋଧ ଶିଶୁଟି ହସେ ,

   ଆଜି ଏ ସାଧାରଣତନ୍ତ୍ର ଦିବସେ ।

ଅବଳା, ଦୁର୍ବଳା, ସଧବା, ସବଳା,

ଅନୂଢ଼ା, ପ୍ରୌଢ଼ା ,ଲଙ୍ଗଳା, ଫୁଙ୍ଗୁଳା

କୃଷକ, ଶ୍ରମିକ ସବୁରି ଦେହରୁ

          ସ୍ବାଧୀନ ଅତର ବାସେ ,

    ଆଜି ଏଇ ସାଧାରଣତନ୍ତ୍ର ଦିବସେ ।

ମନ ପୁରି ଯାଏ , ଛାତି ଫୁଲି ଯାଏ

ବନ୍ଦେ ମାତରମ୍ ଆତ୍ମା ଗାଉ ଥାଏ

ମୁକ୍ତ ଆକାଶରେ ତ୍ରିରଙ୍ଗା ଉଡ଼େଇ

       ଲାଲକିଲ୍ଲା ଯେବେ ହସେ ,

    ଆଜି ଏ ସାଧାରଣତନ୍ତ୍ର ଦିବସେ ।

ଆସ ଭାଇ ବଂଧୁ ନେତା ଜନତା

ଅଖଣ୍ଡ ରଖିବା ଦେଶର ଗାଥା

କୋଟିଏ ସଲାମ ଭେଟି ଦେବା ଆମେ

        ଶହୀଦ୍ ମହତ୍ ଉଦ୍ଦେଶ୍ୟେ,

     ଆଜି ଏ ସାଧାରଣତନ୍ତ୍ର ଦିବସେ ।