ଆଦ୍ୟ ଦେବ

ଆଶା ଆଶ୍ଵାସନାର ଅସରନ୍ତି ଆବେଗ

ଉତ୍ସାହ ଉଦ୍ଦୀପନାର ଉତ୍ତୁଙ୍ଗ ହିମାଳୟ

ଯିଏ ଦେଇପାରନ୍ତି

ସହସ୍ର ସୂର୍ଯ୍ୟର ଶକ୍ତି

ପବନଠୁ ପାରିବାର ପରାକ୍ରମ

ଯାହାଙ୍କ ହୃଦୟରେ ପ୍ରବାହିତ

ଦୟାର ମହୋଦଧି

ସ୍ନେହର ଶାଖା ପ୍ରଶାଖା

ନାଲି ଆଖି ନିଆଁ ତଳେ

ଭାଗ୍ୟ ଭବିଷ୍ୟତର ଜ୍ୟୋତିଷ୍କ

ଭୟ ଭକ୍ତିର ଭଗବାନ

ନୀତି ନିୟମ ନିଷ୍ଠାର

ନିର୍ମଳ ନିର୍ଯାସ

ପ୍ରେରଣା ପ୍ରତିଶ୍ରୁତିର ପୂର୍ଣ୍ଣ ପରିଧି

ପ୍ରେମ ପ୍ରୀତିର ପର୍ଯ୍ୟାପ୍ତ ପରିସୀମା

ଛତ୍ର ଛାୟା ତଳେ ଥିଲେ

ଆକାଶେ ଛାତ ଛାଇ ନିଅଣ୍ଟ ହୁଏ

ଯାହା ପାଇଁ ମୁଁ ଆଜି ଅପରାଜୟ

ମୁକୁଟ ବିହୀନ ସମ୍ରାଟ

ତାଙ୍କର ପ୍ରତିଟି ଶବ୍ଦର ପ୍ରେରଣା

ପୋଥି ପୁରାଣ ପ୍ରବଚନ

ସେ ମୋ ବାପା

ସୃଷ୍ଟିର ଶ୍ରେଷ୍ଠ ଆଶୀର୍ବାଦ

ସେ ପରମ ପୂଜ୍ୟ ଚିର ବନ୍ଦନୀୟ

ପିତୃ ଦେବଙ୍କ ପଦାରବିନ୍ଦରେ

ମୋର ପ୍ରୀତି ପୂର୍ଣ୍ଣ ପ୍ରଣତି ।

କାର୍ତ୍ତିକେଶ୍ୱର ସାହୁ