ମା' ତୁମେ ଆସ

ମା' ତୁମେ ଆସ

'ତିତିଲି' ତାଣ୍ଡବରେ,

ଅବା ଶୁଭ୍ର, ସୁଶୀତଳ

କମନୀୟ କାମିନୀ ବେଳାରେ।

ଫେଡିନିଅ ସବୁ ପ୍ରଶ୍ନବାଚୀ

ପାପ, ପ୍ରଳୟ

କଳଙ୍କିତ କଳା ଓ କାଳିମା।

ପଣତରେ ପୋଛିଦିଅ

ଆଖିଏ ଅଶ୍ରୁରେ ଭିଜା

ଜରାଜୀର୍ଣ୍ଣେ ଶୋଷିତ

ଯେତେ ସବୁ ଜୀବନ ଯାତନା।

ବୁଣିଦିଅ ହୃଦୟର କୋଣେ କୋଣେ

ସୌହାର୍ଦ୍ଦ୍ୟର ସବୁଜିମା

ଗଢିଦିଅ ମନର ଭୂଗୋଳେ

ସୁନ୍ଦର ସୁସ୍ଥ ପରିସୀମା।

ଅବିଶ୍ୱାସ ବିଷ ଏଠି ବଡ଼ ମାରାତ୍ମକ

ପାଶବିକ ପ୍ରକୃତି ତ ଆଉ ଭୟଙ୍କର

ପାରିବତ ଶୋଷିନିଅ

ଦାନବୀ ମାନବର ବିଷାକ୍ତ ରକ୍ତକୁ

ଖୋଲିଦିଅ ମୁଖାପିନ୍ଧା ମଣିଷର

ଚିତ୍ର ଓ ଚରିତ୍ର।

ଦୂରକର

ଅନ୍ୟାୟ, ଅନୀତି ଦୁର୍ନୀତି।

ମା’ ଦଶଭୁଜା ଭରିଦିଅ

ଶାନ୍ତି, ପ୍ରୀତି, ମୈତ୍ରୀ,ସାହାସ,ଶକତି

ଗଢିଦିଅ ଆଉ ଏକ

ସଜଫୁଟା ସବୁଜ ପୃଥିବୀ ।

ଯେଉଁଠି ଥିବ କେବଳ

ପ୍ରେମ ଆଉ ପ୍ରେମ

ଏଇ ପାର୍ବଣରେ.....।