संसाराचे गाणे
संसाराचे गाणे
तु असतांना संसाराला माझ्या काय उणे,
चल सखे चल गावू मिळूनी संसाराचे गाणे.|| धृ ||
सप्तपदी चालता चालता दिली ऊभयता वचने
पदोपदी तु पाळत आली मनापासुनी सजणे,
दु:खी असता लपवून सारे वदनी हासू उसने
चल सखे चल गावू मीळुनी संसाराचे गाणे..|| 1 ||
सांजवेळी तु नित्य अंगणी मंद लावीता पणती
शांत मनातील तिच्या प्रकाशे भाव वदनी उजळती,
नजरेवर तव नजर ही पडता हळुच तुझे लाजणे
चल सखे चल गावू मिळुनी संसाराचे गाणे..|| 2 ||
संसाराच्या वेलीवर ही फुलली दोन फुले
बोल ऐकता कानी तयांचे आनंदे मन झुले,
बाललिला ग बघता त्यांचा मुक्तपणे हासणे
चल सखे चल गावू मिळूनी संसाराचे गाणे..|| 3 ||
सुख-दु:खाच्या वेळी मजला तुच प्रिये सावरले
दृष्टीआड क्षणी होता तू मन माझे बावरते,
भाव भितीचे मज चेह-यावर पाहून तव घाबरणे
चल सखे चल गावू मिळुनी संसाराचे गाणे..|| 4 ||
अनेक जन्मांसाठी पडाव्या अपुल्या रेषीम गाठी
साथ मिळावी तुझी मला ग सहस्त्र जन्मांसाठी,
ईश्वरचरणी याहूनी दुसरे अन्य नसे मागणे
चल सखे चल गावू मिळूनी संसाराचे गाणे..|| 5 ||
अखेरचा क्षण येता जवळी परमेशाला प्रार्थीन मी
अंतर ठेवूनी दोन क्षणांचे आधी प्रियेला मज नेशी,
अखंड राहो तुझ्या कपाळी सौभाग्याचे लेणे
चल सखे चल गावू मिळूनी संसाराचे गाणे..|| 6 ||
तु असतांना संसाराला माझ्या काय उणे,
चल सखे चल गावू मिळूनी संसाराचे गाणे......