Library
Profile
स्त्री जन्माची कहाणी
स्त्री जन्माची कहाणी
काळी शेतमाऊली ही करीन मी तिचीे सेवा
नाही आसरा कुणाचा तिच देई मजला मेवा......|| धृ ||
चिलीपिली माझी घरी सासू सांभाळी म्हातारी
एकटी मी नार आज दिनरात कष्ट करी
नाही कळला कसारे मला नशीबाचा कावा
नाही आसरा कुणाचा तिच देई मजला मेवा......|| 1 ||
होता सुखाचा संसार घरदनी तालेवार
सूख समृध्दीन सदा नांदे माझ घरदार
झाल क्षणात उध्वस्त करू कुणाचारे धावा
नाही आसरा कुणाचा तिच देई मजला मेवा......|| 2 ||
देव कोपला कोपला नाई पावसाच पानी
कर्ज झाल डोईवर कुणा ताळमेळ नाही
घरदनी गेला आहारी घेई दारू आता देवा
नाही
आसरा कुणाचा तिच देई मजला मेवा......|| 3 ||
दिन जाती हे निघून नाही काहीच सुधार
किती वेळ मागू लोका उधारनी पाधार
कंटाळूनी धन्याने हो फाशी घेतली तेंव्हा
नाही आसरा कुणाचा तिच देई मजला मेवा......|| 4 ||
सगेसोयरे पांगले भाऊ बंद गेले दूर
मित्र आणि शेजा-यांचा नकारचा असे सुर
एकटी मी नार आता करू कुणाचारे धावा
नाही आसरा कुणाचा तिच देई मजला मेवा......|| 5 ||
मीच मायबाप आता झाली दोन मुलांची
कसूनीया कंबर हो सेवा धरणी मातेची
करो कुणी घाव कितीही उधळीन मी त्या डावा
नाही आसरा कुणाचा तीच देई मजला मेवा......|| 6 ||
