शब्दांचे भांडण

शब्दांचे भांडण | शब्दांनी वाढते |

मने ही तोडते | एकमेका ||

शब्दांना ती धार | नको तलवार |

दुधारीच वार | शब्द करी ||

व्रण ना दिसती | घाव काळजात |

खंत ती मनात | राहतसे ||

जपूनी वापरा | शब्द तोंडातून |

उगी मुखातून | सोडू नये ||

शब्दांत माधुर्य | शब्द आहे प्रेम |

शब्द मुलायम | वाटे कधी ||

शब्दांने गोडवा | येई ओठांवर |

शब्द मनावर | डसताती ||

घायाळ करती | शब्दांनीच मने |

काढू नये उणे | एकमेका ||

शब्दांचे भांडण | ना करावे कधी |

भांडणांची व्याधी | नको देवा ||

शब्द अलंकार | शब्दच अमृत |

शब्द गणगोत | असे सदा ||

शब्द असे नांव | शब्दच रे घाव |

शब्द घेते ठाव | ह्रदयाचा ||

शब्द शब्द मोती | शब्द अनमोल ||

जाऊ नये तोल | स्वत:चा  ||