मृदगंध

सुगंध आसुसलेल्या ओलेत्या मातीचा,

तनामनास ओलेचिंब करतो,

रोमांचित तो करून जातो.             1

सुवासिक जाई जुई, चाफा

अन मोगऱ्याचा गजरा

लावण्यवती केसात माळते

प्रियकर प्रफुल्लित होतो,

संमोहित तो होऊन जातो.              2

सुवासिक ती रात राणी

अन रजनीगंधा,

अधिर प्रेयसी प्रणयासाठी,

आतुर ती मिलनासाठी,

ओढ प्रणयगंधाची अनावर,

भिरभिरती नजर तिची

प्रियकराला शोधु लागली

वाट त्याची पाहू लागली.               3

मृदगंधित नाजुक ती 

बकुळफुलें कोमेजली,

सुकली तरी दरवळतातच

जणू संसारात रमलेली युवती,

रुजलेली, हरपलेली, पुरंध्री.             4

गोड गोजीरा लाल गुलाबी गुलाब,

सुवासिक प्रेमाचे ते प्रतीक

जणू संसार गोड गुलकंद

तर कधी कटू अन काटेरी

परिमळ गुलाबाचा जेव्हां दरवळतो

मनास माझ्या प्रसन्न करून जातो.          5

सुगंधित तो वृक्ष चंदन

शीतल करीतसे माझे मन

माझ्या ओंजळीतली अबोली

न बोलता जीवनातले

सार सोपे सांगते.                     6

हास्याची अन प्रसन्नतेची

बकुळफुलें विलसु देत मुखावर

दरवळु दे ती आयुष्यभर

दरवळु दे ती आयुष्यभर.                 7