दोन डोळ्यांच्या काठाला
दोन डोळ्यांच्या काठाला
1 min
216
दोन डोळ्यांच्या काठाला
नीज केव्हाची अडून
आत यावया लाजते
कोणी बसले लपून. ||१||
दोन डोळ्यांच्या काठाला
रेषा काजळ रेखिली
छबी सख्या साजणाची
ऐन्यामध्ये निरखिली. ||२||
दोन डोळ्यांच्या काठाला
थवा उतरे स्वप्नांचा
चारा कोवळया आशेचा,
चुरा चांदणं मोत्यांचा. ||३||
दोन डोळ्यांच्या काठाला
रोजचीच ये-जा झाली,
रानामध्ये आठवांच्या
चिंब पहाट भिजली. ||४||
दोन डोळ्यांच्या काठाला
आज अशा सांजवेळी
मन कातर कातर,
भास करतात खेळी. ||५||