बाप माझा

बाप माझा नशीबाचं बीज

शेतामंधी पेरीत गेला

दाबुनी मुक्या वेदना

जगता-जगता मरत गेला

पीकवूनी पांढरं सोनं

लोखंडाच्या भावात विकत गेला

फेडता-फेडता सावकाराचे व्याज

जगता-जगता मरत गेला

निघणारा दिवस सारखाच

पावसाळे-उन्हाळे झेलीत गेला

नशीबाले दोष देऊनी

जगता-जगता मरत गेला

आज नाही तर उद्या मिळल सुख

याच आशेवर जगत गेला

कर्जाचा डोंगर घेऊनी उरावरी

जगता-जगता मरत गेला

दिवस-रात्र राबूनी देह थकला

शेवटचा श्वास इथे घेऊनी गेला

शांत झोपला सुखाने मातीत

जगता-जगता मरत गेला.