ನನ್ನವಳೇ ನನ್ನಮ್ಮಾ

ನಿನ್ನ ಉದರದಿ ಅಡಗಿ ಆಶ್ರಯ ಬಯಸಿ

ನಿನ್ನ ಎದೆಯಾಳದಲ್ಲಿ ಕಾಳಜಿ ಬಯಸಿ

ನವಮಾಸದ ಬೇನೆಯಲ್ಲಿಯೂ ಖುಷಿಯಾಗಿ

ನನ್ನ ಅರಸಿದ ನನ್ನವಳೇ ನನ್ನಮ್ಮಾ ||

ಎದೆಹಾಲಿನಲ್ಲಿ ಸ್ವರ್ಗಬಲವ ಧಾರೆಯೆರೆದು

ಕೈ ಬೆರಳು ಹಿಡಿದು ಸೆರಗ ಮುಚ್ಚಿ

ಭಯದ ಕಾರ್ಮೋಡದಲ್ಲಿ ಕಾಮನಬಿಲ್ಲಯಾಗಿ

ಪ್ರೀತಿಯ ಕಾರುಣ್ಯಮೂರ್ತಿಯ ನನ್ನವಳೇ ನನ್ನಮ್ಮಾ ||

ಎದೆಯಪ್ಪಿ ಪ್ರೀತಿ ಪಸರಿಸಿದ ದೇವಿ

ಪ್ರೇಮದ ಪಾಠ ಕಲಿಸಿದ ಗುರುಮಾತೆ

ಕನಸು ಕಟ್ಟಲು ನೆರವಾದ ಕನಸುಗಳ ನಿರ್ಮಾಪಕಿ

ದೇವಲೋಕದಿಂದ ಧರೆಗಿಳಿದ ನನ್ನವಳೇ ನನ್ನಮ್ಮಾ ||

ಹೆಣ್ಣು ದುರ್ಬಲೆಯೆಂದು ಮರೆತ ಹೆಣ್ಣು

ಬಿಸಿಲಲ್ಲೂ ಪ್ರೀತಿಯ ತಂಗಾಳಿ ಬೀಸಿ

ಮಳೆಯಲ್ಲಿಯೂ ಪ್ರೇಮದ ಆಸರೆಯಾಗಿ

ಸೆರಗಯಲ್ಲಿ ಕಾವಲು ಕಾದ ನನ್ನವಳೇ ನನ್ನಮ್ಮಾ ||

ಕೊಚ್ಚಿ ಹೋಗೊ ಪ್ರವಾಹದಲ್ಲಿಯೂ ಆಶಾಗೋಪುರವಾಗಿ

ಒಡೆದು ಹೋದ ಮಡಿಕೆಯಲ್ಲಿಯೂ ಅನ್ನದಾತೆಯಾಗಿ

ಕೈ ತುತ್ತು ತಿನ್ನಿಸಿ ತನ್ನ ಹೊಟ್ಟೆಬರೆ ಮುಚ್ಚಿಕೊಂಡ

ಸದಾ ಜಪಿಸುವ ಅನ್ನಪೂರ್ಣೇ ನನ್ನವಳೇ ನನ್ನಮ್ಮಾ ||

ಜಗವ ತೋರಿಸಿ ದೈವವನ್ನು ಹರಿಸಿ

ಕನಸುಗಳ ಸಾಗರದಲ್ಲಿ ದೋಣಿಯಾಗಿ

ಮುನ್ನಡೆಸೋ ನನ್ನ ಪುಟ್ಟ ಹೆಜ್ಜೆಗಳ ಮಾರ್ಗದರ್ಶಕಿ

ಕಾಯುವ ದೈವವು ನನ್ನವಳೇ ನನ್ನಮ್ಮಾ ||