બેસ્ટ કપલ -બેસ્ટ આઈટમ

મોટું એવું શહેર, ઠીક ઠીક મોટો એવો ગુજરાતી સમાજ, દરેક વર્ષે યોજાયા કરતો એવો આનંદ બજારનો ‘આનંદમ આનંદમ’નો પોપ્યુલર પ્રોગ્રામ. ખાણી – પીણીના સજાવેલા સ્ટોલ, તેમાં વ્યવસ્થિત ગોઠવેલીને મૂકેલ ચટપટા અને તમતમતા ફરસાણ સાથે સુગંધિત મઘમઘતી મીઠાઈઓની મહેક વાતાવરણને પણ ખુશનુમા બનાવી રહી હતી.

આજના આ વિશિષ્ટ આનંદ બજારમાં આવી રહેલા ગુજરાતીઓ સૌરાષ્ટ્ર, કચ્છ, અને વિધ વિધ પ્રદેશોનું પ્રતિનિધિત્વ કરતા વસ્ત્રપરિધાન સાથે ગુજરાત સમાજના વિશાળ પ્રાંગણને કલરફુલ અને પચરંગી રૂપ-સ્વરૂપ આપી રહ્યા હતા. દર વખત કરતા આ વર્ષના આનંદબજારમાં બેસ્ટ વાનગી ઉપરાંત બેસ્ટ કપલનું ઇનામ પણ જાહેર થવાનું હતું. રામોજી સ્ટુડિયોમાંથી, ચાલી રહેલા શૂટિંગમાંથી એક બહુ જ જાણીતા ડાયરેક્ટર અને એક અતિ લોકપ્રિય અભિનેત્રી આવીને બેસ્ટ કપલનું સિલેકશન કરવાના હતા. એ બેઉને જોવા માટે પણ આતુર- ઉત્સુક પ્રેક્ષકો અધીર અધીર થઇ રહ્યા હતા.

એ બેઉની સાથે એક ત્રીજી વ્યક્તિ પણ આ સિલેકશન માટેની કમિટીમાં હતી, જે સમાજના જાણીતા અને લોકપ્રિય પ્રમુખ હતા. બેસ્ટ વાનગી માટે શહેરની ત્રણ મોટી હોટલોના અનુભવી માલિકો આવ્યા હતા. તેમાં એક મહિલા માલિક પણ હતી. આ બેઉ સિલેકશન કમિટીઓ ફરવા લાગી અને ત્રણ ચાર કલાકોના ભ્રમણ-પરિભ્રમણ કરી તેઓ પોતાનો નિર્ણય જાહેર કરવા તૈયાર થયા. વાનગી કમિટીએ શ્રેષ્ઠ મીઠી વાનગી તરીકે માલપૂઆ બનાવનાર બનાવનાર એક બહેનનું નામ જાહેર કર્યું અને ઉત્તમ ફરસાણ બનાવવા માટે તમતમતી ભેળ- પૂરી બનાવનાર બહેનનું નામ જાહેર કર્યું.

શ્રેષ્ઠ કપલના સિલેકશન માટે સમાજના પ્રમુખ અને અભિનેત્રીનો અભિપ્રાય એક નવા જ પરણેલા સુંદર દેખાવડા યુગલની તરફેણમાં હતો, જયારે ડાયરેક્ટરના મતાનુસાર એક બીજું કપલ મૂવીના કપલ જેવું ફ્રી અને આઝાદ-બિન્ધાસ લાગવાથી બેસ્ટ કપલ લાગતું હતું. સમાજના પ્રમુખે સમજાવ્યું કે,અભિનેત્રીએ પસંદ કરેલું કપલ બેસ્ટ કપલ છે કારણ કે સમાજની અને ગુજરાતની સંસ્કૃતિને ઉજાગર કરતુ બેઉનું વસ્ત્રપરિધાન તેમ જ ગુજરાતનું અમી ટપકાવતું સંસ્કારી શાલીન વર્તન તેમને જ શ્રેષ્ઠ કપલ તરીકે સાબિત કરે છે. એ જ કપલને પારિતોષિકમળવું જોઈએ. ડાયરેક્ટર માની ગયા અને બેસ્ટ કપલનું નામ જાહેર થતા જ તાળીઓના જોરદાર ગડગડાટે એ ગુજરાતની અસ્મિતાને શોભાવતા કપલને હાર્દિક અભિનંદન આપ્યા. એ યુગલ શરમાતું શરમાતું સ્ટેજ પર બેસ્ટ કપલનું પારિતોષિક લેવા આવ્યું તો એક બીજા પ્રતિસ્પર્ધી કપલનો જોરદાર વિરોધ જાહેર થયો. પક્ષપાત થયાનો આક્ષેપ પ્રમુખ પર મૂકવામાં આવ્યો.

ત્યારે એ વિજેતા કપલ તરફથી વિનમ્ર ઘોષણા કરવામાં આવી કે અમે તો મનોમન એક બીજાને પસંદ કરી માતાપિતાની રાજીખુશી સાથે પરણ્યા છીએ એટલે અમને આ બેસ્ટ કપલનું ઇનામ મેળવવાની ન ઇચ્છા છે કે ન તેનું કોઈ આકર્ષણ પણ છે. અમે તો આ પ્રતિસ્પર્દ્ધા માટે તૈયાર થઈને આવ્યા પણ નથી. અમે તો ગુજરાતનો અને ગુજરાતીપણાનો ભરપૂર આનંદ અનુભવવા અને માણવા માટે જ આવ્યા છીએ. અમારી વિનતિ છે કે આ બીજા કપલને જ બેસ્ટ કપલનું પારિતોષિક સાદર આપવામાં આવે. અમે આ હરીફાઈ માટે ન તો આવ્યા છીએ કે ન અમને આ પરીતોષિકમાં કોઈ રસ પણ છે.અમે સ્વેચ્છાએ આ સ્પર્ધામાંથી ખસી જઈએ છીએ એટલે આ બીજા કપલને જ બેસ્ટ કપલનું ઇનામ જાહેર કરો અને તેમને ખુશ કરો.

તેમની આ ખેલદિલીથી સહુ કોઈ પ્રસન્ન અને પ્રભાવિત થયા તેમ જ મનથી તો સહુએ આ ત્યાગી કપલને જ શ્રેષ્ઠ કપલ સ્વીકાર્યા. એ જ સમયે શ્રાવણી અમીછાંટણા એ કપલને વધાવવા લાગ્યા. વિરોધાભાસ જોવા જેવો હતો કે, ફાયનલ વિજેતા જાહેર થયેલ કપલ વરસાદથી સુરક્ષિત અને મુક્ત એવા સ્ટેજ પર પારિતોષિક લેવા માટે અધીર અને ઉતાવળા થઇ રહ્યા હતા.