વર્ષો પછી...

આજે અનાયાસે હું અહીં આવી ચડ્યો ?

ના, વર્ષો પછી હું અહીં પાછો ફર્યો.

મન અને મસ્તિષ્ક વચ્ચે થયું ઘર્ષણ

કેમ આ ભૂમિ પ્રતિ અનન્ય છે આકર્ષણ ?

છેક દૂરથી જ્યારે મેં દીઠી એક ટેકરી,

થયું કદાચ ભોળપણની કોઇ યાદ રહી છે એકલી.

એ ટેકરી પર જ્યારે મેં વડલો દીઠો,

યાદ આવ્યો નાનપણનો પ્રસંગ મીઠો મીઠો.

વૈશાખની બપોરે અહીં કેટલી રમતો રમેલી,

કેટલીય તકરારો અહીં ભીની સંકેલી.

કેટલાય અષાઢે હું ભીંજાયો અહીં,

કેમ વિસરાય એ યાદો આ હૃદય મહીં.

પણ,

કોંક્રીટના જંગલમાં હું ઘબરાયો, ઘુંટાયો, ઘવાયો,

હાશ, આજે વર્ષો પછી હું પાછો તો ફર્યો.