મારા સાયબા

દીપક તારા કોડિયે નાનકડી હું વાટ, મારા સાયબા! 

હસતું મુખડું દેખી મુજ હોઠે છે મલકાટ, મારા સાયબા! 

ભીતર રાખ્યાં પુમડાં, પ્રેમ અત્તરમાં બોળી - ઝબોળી,

ચો તરફ છે એ જ સુગંધી પાવન છાંટ, મારા સાયબા! 

તેજ સમ તું ઝળહળે ને હું અજવાળું ઝાંખું - પાંખું,

હું પ્રતિમા કંડારેલી તું શિલ્પી તું જ સલાટ, મારા સાયબા! 

અવસર આવ્યો આંગણિયે જો મીઠો -મીઠો, રૂડો - રૂડો, 

જેમ ઊડે પંખી નભમાં, હીંચકું હિંડોળાખાટ, મારા સાયબા! 

મારાં ગીતો મારા શબ્દો પાછળ તારો પ્રેમ ઊભો છે;

'દીપ' ની સંગે 'હર્ષ'ની ખુશ્બુનો છે પમરાટ, મારા સાયબા!