કેવો હશે વાલમો?

યૌવનની પાંખે શમણાં ફૂટે નખરાળી આંખે,

નટખટ છોકરી શરમાતી ચાલે એનું ગંભીર મૌન નાચે,

થરકાટ ને થનગાટ વચ્ચે સવાલ ને એ ભાળે,

કેવો હશે વાલમો?

એ તો નિશદિન કંઈક ખોવાણી,

એની ચાલ ને કેડી ભુલાણી,

રમણ ભમણ કંઈક આ બટકબોલી છોરી,

પ્રીતનાં પોખણા લઈ પનઘટ ની ચાલ,

બેડલા ને વાત કરે મલકે કૂવાની પાળ.

એ તો લજામણી જેમ શરમાતી,

કેવો હશે વાલમો?

કંઈક આમ એ પુલકિત તો થાતી,

ચંદ્રની લાલિમા ને વાલમનાં નામે,

લલાટે પોતાનો ચન્દ્ર અજવાળતી.