ગૃહ
ગૃહ
જયાં વિશ્વનાં ભ્રમણમાત્ર સમાપ્તિ પામે,
જ્યાં સૃષ્ટિની સરણિઓ સઘળી વિરામે;
ભૂગોળને પ્રકટ જ્યાં પરખાય છેડો,
ને જ્યાં સુવર્ણમય મેરૂ વસુંધરાનો.
અંભોધિને ઉતરતાં, વસતાં વિમાને,
ને વિશ્વમાં વિચરતાં પ્રિય સાથ સંગે;
ઉંચું સદૈવ વસતું મન, જ્યાં નિરાંતે,
નિદ્રા લઈ સુખદ શાંતિ અપૂર્વ સેવે.
અગ્નિ અનંત ઉરમાં ઉપજાવનારી,
જ્યાં નષ્ટ થાય પળમાં પરતા બિચારી;
જ્યાં ચેતનત્વ જડ વસ્તુ સમસ્ત પામે,
ને કૈં નવીન ઉર–ભાવ થકી વધાવે.
જ્યાં નેત્ર મીલિત છતાં અણુએ જણાય,
ને અંધકારબળ નિષ્ફળ નિત્ય જાય;
આનંદ જે પરમ દુર્લ્લભ પ્રાણીઓને,
તે મૂર્તિમાન બની જ્યાં દિનરાત ડોલે.
જે દેહલી પર જરા પદ મૂકવાથી,
ઇદ્રિયમાત્ર નિજ મંદિર જાય બેસી;
ને ખીલતા હૃદય–પંકજની રસીલી
એકે રહે ન કદી પાંખડી જ્યાં અધુરી.
વિશ્વાંબરે વિહરતા વ્યવસાયસેવી,
પ્રાણી-પર્તંગ તણી જ્યાં દૃઢ બાંધી દોરી;
જ્યાં દંભ સંસૃતિ તણા હઠી દૂર જાય,
જ્યાં માનરોગ થકી માનવ મુક્ત થાય.
જ્યાં પ્રેમનો પ્રથમ પાઠ મનુષ્ય પામે,
આત્મીયભાવ ઉર જે સ્થળમાંથી જામે:
જ્યાંથી વહે જગત રેલતી સ્નેહગંગા,
ને જયાં થકી હૃદયનાં સહુ દ્વાર ખુલ્યાં.
જયાં રંક જીવ પણ પૂર્ણ પ્રભુત્વ પામે,
ને ભૂપતિત્વ ભદુર્લભ સર્વ સેવે;
જ્યાં અંધ પ્રાણી પણ થાય સહસ્ત્રચક્ષુ,
જ્યાં દિવ્ય દર્શન સદૈવ સ્વતંત્રતાનું.
આઘાત સંસતિ તણા શતધા સહીને,
ને કલેશના વિકટ વહનિ વિષે વસીને;
ભેદાઈ, શુષ્ક થઈ ને સળગી ગયેલું,
જ્યાં પૂર્ણ પક્ષવિત માનસ થાય પાછું.
આકર્ષણો અતિ અલૌકિક ૨મ્ય જેનાં,
ઈદ્રાસનો અહીં તહીં અથડાય જેમાં;
જેમાં રહ્યું હૃદય, જે હૃદયે રહેલું,
અન્યોન્યભાવ, રસ, ઐક્યથકી ભરેલું.
સંસારના સુખદ શોભન સ્વર્ગ જેવું,
આનંદનું, પ્રણયનું ગૃહ એ અમારૂં:
સૌન્દર્ય જ્યાં સકળ વિશ્વ તણું વિરાજે,
ને ન્યૂનતા વિભવમાત્ર તણી મટાડે.