నా హృదయం
నా హృదయం
నా మురళిగ నీవున్నది..చెబుతున్నది నా హృదయం..!
నీ మౌనపు స్వరమాధురి..వింటున్నది నా హృదయం..!
ఈ తనువున అణువణువున..వేనవేల కోవెలలే..
నీ నవ్వుల దీపాలను..చూస్తున్నది నా హృదయం..!
ప్రశాంతతకు అద్దంలా..వుంది కదా ప్రతి నిముషం..
గుండె గువ్వ పరవశమును..మోస్తున్నది నా హృదయం..!
వింతవింత అనుభవాల..తోటలోన నీ జతలో..
చెలిమిపూల పరిమళమే..అవుతున్నది నా హృదయం..!
అమృతమధుర శాసనాల..మేఘమాల నీవేగా..
ఓతియ్యని ప్రేమలేఖ..వ్రాస్తున్నది నా హృదయం..!