மே 20
மே 20
அறுங்கோணத்தில் அந்தரத்தில் மிதக்கும்;
மழலையின் கன்னம் ஒத்த மிருதுவான பல புள்ளி வானம்;
பிரமிக்க வைக்கும்
பிரபஞ்சத்தின் முதல் பொறியாளர் கூட்டம்;
சமிஞ்கை திறனாளிகள்;
தட்ப வெப்ப வல்லுநர்கள்;
எண்ணிலடங்கா பிரம்மாண்டங்களை வழிநடத்தும்
பெண்களை மையம் கொண்ட சாம்ராஜியம்;
கூட்டுக் குடும்பத்துக்குள் தனிக்குடித்தனம் என்ற இனிமைக்குள் புகுந்து புரண்டு போதை கொண்ட உலகு
தேனீயின் உலகு-
தனித்துவமான உலகு…
தேனீக்கள் தினமாம்..(20மே)
பூமியின் ரகசிய
இயக்குனர்
கடமைத் தவறா
உழைப்பாளி;
நீ தேடித் தேடி
உணவு சேமிக்கிறாய்
உன்னை துரத்தி துரத்தி
அதை கைப்பற்றி
உன் சேமிப்பே
உனக்கானதில்லை என்று மமதை
கொள்ளும்
-என் இனம்-பாவம்....
உங்களை பூமிப்பந்தில் இருந்து முழுவதும் துரத்திவிட்டால் அரை திங்களுக்கு மேல் என் இனத்திற்கு வாழ்க்கை சாத்தியமற்றது என்று தெரியாத கூட்டத்தில் நானும்..
இருந்தும் நீ உன் சேமிப்பை
நிறுத்துவதில்லை-
நீ இருப்பதால் மட்டுமே...
பக்கத்து வீட்டு பூந்தோட்டத்து சொந்தக்காரி எனக்கு சம்மந்தியானாள்
ஆம்!
அயல் மகரந்த சேர்க்கை உன்னால் சாத்தியமானதால்;
நீ இருப்பதால் மட்டுமே
மருத்துவ உலகம் சாத்தியமாயிற்று;
சில கசப்பு மருந்துகள் நாவை தாண்டி தொண்டையை கடந்து செல்கின்றது;
சில நேரங்களில் மருத்துவர்கள் கூட குழந்தைகள் விருப்பப் பட்டியலில் இடம் பெற உன் பங்கு மறுக்க முடியாதது
உன் பெருமையை
உலகிற்கு எடுத்துச்
சொல்ல நீ யாரையும் தேடியதில்லை;
எது வந்த போதும்
உன் துடி துடிப்பு குறைந்ததில்லை,
சோர்ந்ததில்லை
உன் பயணம் தோற்றதில்லை
- உன் போல் -
மலரை காதலிப்போர்
இப்புவியில் இல்லை,
உன் ஆர்பரிக்கும்
ரீங்காரம்
உன் காதலின்
அடையாளம்
ஒரு துளி தேனிற்கு
பல மயில் தூரப்பிரயாணம் …
இயற்கையின்
ஆச்சர்யம்தான்
உன் ஜனனம்!
உன் போல்
பசுமை போராளி
ஓருபோதும் ஜனிக்க முடியாது…!